Ո՞վ է ասել, որ ապրիլյան պատերազմն ավարտվել է․ բա սա ի՞նչ արխայինություն է․ Արման Բաբաջանյան. ՏԵՍԱՆՅՈՒԹ

Ազգային ժողովի «Լուսավոր Հայաստան» խմբակցության պատգամավոր Արման Բաբաջանյանն այսօր խորհրդարանում անդրադառնալով Կառավարության ծրագրի որոշ կետերի՝ նշեց, որ այս փաստաթուղթը ապառազմավարական, ապահայեցակարգային փաստաթուղթ է և չի պարունակում որևէ ռազմավարական հենք, ծրագիրը չի ներկայացնում կարճաժամկետ, միջնաժամկետ և հեռահար քայլեր։

Պատգամավորրի համոզմամբ՝ ծրագրից բխում է, որ Հայաստանը առաջիկա 5 տարում նախորդ 20 տարիների նման շարունակելու է վարել ինքնամեկուսացվող, միավեկտոր տնտեսական քաղաքականություն և նոր իշխանությունը ոչինչ չի ձեռնարկելու նոր ռազմավարական գործընկերներ գտնելու, նոր դաշնակցային հարաբերություններ հաստատելու, երկրի արտաքին քաղաքականությունը դիվերսիֆիկացնելու և հավասարակշռելու ուղղությամբ. «Այստեղ նկարագրված արտաքին քաղաքական առաջնահերթությունները հանգեցնում են մի շատ վտանգավոր եզրակացության՝ մենք մեր արտաքին քաղաքականությունը շարունակելու ենք վարել՝ հաշվի առնելով ոչ թե Հայաստանի և հայության շահը, այլ ելնելով երրորդ երկրի անփոխարինելության սկզբունքով և նրա հանդեպ ինչ-ինչ պարտավորություններից: Այս տեսքով Ռուսաստանը, օրինակ, դե ֆակտո հանդես է գալիս որպես մեր արտաքին քաղաքականության խոչընդոտ և աշխարհի հետ հարաբերվելու չարաբաստիկ պրիզմա, որը նախորդ իշխանության արատավոր արտաքին քաղաքականության արտահայտությունն է»:

Անդրադառնալով Կառավարության ծրագրում արցախյան հարցի կարգավորմանը՝ Բաբաջանյանը նշեց, որ այդ բաժնում շատ են անորոշությունները, ապա հարցադրում հնչեցրեց․ «Ո՞վ է ասել, որ ապրիլյան պատերազմն ավարտվել է․ բա սա ի՞նչ արխայինություն է»։

Մանրամասները՝ տեսանյութում։

Աղավնի Սուքիասյան