Սա զրույց է վարչապետի և քաղաքացիների միջև, բայց ոչ երբեք Կառավարության ծրագիր․ Մանե Թանդիլյան․ ՏԵՍԱՆՅՈՒԹ

Հասարակության մեծ մասը սկսել է կորցնել սեփական երկրում սեփական ապագայի նկատմամբ հավատը և այստեղ խոսքը կառավարության և իշխանության նկատմամբ վստահության մասին չէ: Այս մասին այսօր Ազգային ժողովում Կառավարության ծրագրի քննարկման ժամանակ ասաց «Լուսավոր Հայաստան» խմբակցության պատգամավոր Մանե Թանդիլյանը։

«Ես այստեղ մտավախություն չունեմ, իմ մտավախությունը սեփական ապագայի նկատմամբ վստահության նվազումն է: Մենք կարող ենք չխոսել այդ մասին, կարող ենք ուղղակի լռել կամ չնկատել, բայց դա իրավիճակ չի փոխում: Այո՛, վստահությունը սեփական ապագայի նկատմամբ սեփական երկրում, սա այն է, ինչ մենք ձեզ հետ միասին պետք է պաշտպանենք և դողանք դրա վրա: Այստեղ է, որ մեր քաղաքացին ակտիվանալու է կամ ոչ: Ինչպե՞ս անել, որ հանկարծ վնաս չլինի: Հիմա ինչպե՞ս անել, ինչպե՞ս այդ իրավիճակը պահպանել, որ հանկարծ չվնասենք: Այստեղ է իմ և ձեր պատկերացրած կառավարության հեղափոխական ծրագրի մեջ տարբերությունը»,- ասաց պատգամավորը։

Անդրադառնալով Հայաստան ներդրումներ իրականացնելու Կառավարության պատկերացումների և ծրագրի տեսլականին, Մանե Թանդիլյանը հարց հնչեցրեց․ իսկ ինչո՞ւ պետք է օտարերկրյա որևէ ներդրող ներդրում կատարի ՀՀ-ում: «Եթե կարծում եք, որ օրենքի գերակայությունն ու կոռուպցիայի բացակայությունը կամ դրա խոստումը միակ անհրաժեշտ պայմանն է, դա այդպես չէ: Վստահեցնում եմ ձեզ՝ յուրաքանչյուր ներդրող կարողանում է գնահատել տնտեսական վիճակը: Եվ միշտ աշխարհում լինելու են երկրներ, որոնք իմ թվարկած չափորոշիչներով Հայաստանից առաջ են լինելու: Սակայն ինչպե՞ս անել, որ ներդրողը ընտրի հենց Հայաստանը: Այստեղ է անհրաժեշտություն ունենալ այնպիսի ծրագիր և ռազմավարություն, որ կայուն զարգացում ապահովի և սպասելիքներ, ներդրողի սպասումների ու եկամուտների վերադարձ»,- ասաց նա՝ հավելելով, որ իր համոզմամբ, Ազգային ժողովում քննարկվող այս ծրագիրը, կարծես թե, զրույց է վարչապետի և քաղաքացիների միջև, բայց ոչ երբեք Կառավարության ծրագիր։

Մանրամասները՝ տեսանյութում։

Աղավնի Սուքիասյան