Մեր աջակցությունը Սիրիային շահարկման առիթ չի կարող լինել. Տոնոյանը՝ ԱՄՆ պետդեպի հայտարարության մասին. ՏԵՍԱՆՅՈՒԹ

ԱՄՆ դեպարտամենտին, կարծում եմ, որ արձագանքելու է Արտաքին գործերի նախարարությունը: Այս մասին ԱԺ-ում լրագրողների հետ զրույցում ասաց Պաշտպանության նախարար Դավիթ Տոնոյանը՝ անդրադառնալով այն հարցին, որ ԱՄՆ պետդեպը չի պաշտպանում Հայաստանի և Ռուսաստանի միջև համագործակցությունը՝ Սիրիայում առաքելության հարցով:

Հիշեցնեք, որ Սիրիա է գործուղվել հայ մասնագետների 83 հոգանոց խումբ: Մեր հարցին՝ ԱՄՆ պետդեպի արձագանքը ինչ-որ ենթատեքստեր ունի՞ կամ հետևանքներ կլինե՞ն, նախարարը պատասխանեց. «Կա որոշակի աշխարհաքաղաքական հակասություն, բայց մեր աջակցությունը Սիրիային, որի մաս է կազմում նաև հայկական համայնքը, բարոյական առումով անխոցելի է և շահարկման առիթ չի կարող հանդիսանալ»,- ասաց նա:

Նշենք, որ Միացյալ Նահանգների Պետդեպարտամենտն արձագանքել է Հայաստանից մասնագետների 83-հոգանոց խմբի Սիրիա գործուղմանը և ընդգծել, որ չի պաշտպանում Սիրիայի զինված ուժերի հետ ներգրավվածությունը, ինչպես նաև Հայաստանի և Ռուսաստանի միջև համագործակցությունը այս առաքելության նպատակով:

«Մեզ հասկանալի է Սիրիայի մարդասիրական իրավիճակին արձագանքելու այլ պետությունների ցանկությունը, և մենք կիսում ենք Մերձավոր Արևելքում կրոնական փոքրամասնությունների պաշտպանության շուրջ մտահոգությունները: Այնուհանդերձ, մենք չենք պաշտպանում Սիրիայի զինված ուժերի հետ ներգրավվածությունը՝ լինի քաղաքացիական անձանց օգնություն ցուցաբերելու նպատակով, թե ռազմական ուղղվածության: Մենք նաև չենք պաշտպանում Հայաստանի և Ռուսաստանի միջև համագործակցությունն այս առաքելության նպատակով»,- ասված է Պետդեպարտամենտի՝ լրատվամիջոցների հարցումներին տրված պատասխանում, որը տրամադրել են Հայաստանում ԱՄՆ դեսպանատնից:

Դավիթ Տոնոյանը նաև ասաց, որ շարունակելու են Սու-30-ների ձեռքբերումը: «Չորս միավորով չենք բավարարվելու: Կործանիչները, ըստ պայմանագրի, պետք է ձեռք բերվեն համապատասխան ժամանակներում»:

Նարեկ Կիրակոսյան