11.10.2026 | 15:59
Վթարային ջրանջատում Մալաթիա-Սեբաստիա և Էրեբունի վարչական շրջաններում
Սոնա Աղեկյանը ավագանու ծեծկռտուքի ժամանակ իրեն հարվածած ՀՀԿ-ականին մոտ օրերս պատասխան հարված կհասցնի. ՏԵՍԱՆՅՈՒԹ
Հասարակություն
13.02.2019 | 16:08
2018 թվականի փետրվարի 13-ին Ավագանու նիստին տեղի ունեցած ծեծկռտուքից մեկ տարի է անցել։ Այդուհանդերձ, ՀՀ քրեական օրենսգրքի 118-րդ հոդվածի (ծեծ) առաջին մասի և 258-րդ (խուլիգանություն) հոդվածի առաջին մասի հատկանիշներով հարուցված գործը դեկտեմբերի 28-ին կարճվել է ՝ հանցակազմի բացակայության պատճառով։
Ավագանու նախկին անդամ Սոնա Աղեկյանն այսօր հրավիրված ասուլիսի ընթացքում վերհիշեց կատարվածը և ընդգծեց, որ իր պայքարը շարունակվում է։ «Քրեական գործի շրջանակներում տուժող չէին ճանաչում ո՛չ ինձ, ո՛չ խմբակցության ղեկավար Զարուհի Փոստանջյանին։ Հատուկ քննչական կոմիտե հրավիրվում էի վկայի կարգավիճակով, ինչից հրաժարվում էի: Որոշ ժամանակ անց, դատարանն ինձ տուժող ճանաչեց»,- նշեց Սոնա Աղեկյանը։
Լրագրողների հետ հանդիպմանը, նրա խոսքով, Հատուկ քննչական կոմիտեից ևս պետք է ներկա գտնվեին, սակայն մինչև վերջին օրը հստակ պատասխան չեն տվել։
Թավշյա հեղափոխությունից հետո Աղեկյանը հույս է ունեցել, որ արդարությունը կվերականգնվի։ Այդուհանդերձ, ոչինչ չի փոխվել։ «Միայն գործող դեմքերն են փոխվել։ Ամոթ է և խայտառակություն, երբ ասում ենք՝ Հայաստանում արդարադատություն կա։ Դատավորները և քննիչները կաշկանդված են»,- ընգծեց Աղեկյանը։
Ծեծկռտուքին հաջորդած մեկ տարվա ընթացքում ավագանու նախկին անդամը հանրապետականներից հորդորներ է ստացել՝ գործին ընթացք չտալ։ Այդուհանդերձ, չի պատրաստվում դադարեցնել պայքարը։ Մոտակա օրերին պատրաստվում է ծեծկռտուքի ժամանակ իր պարանոցին հարված հասցրած ՀՀԿ-ական Էդմոն Կիրակոսյանին պատասխան հարված հասցնել։ Համոզված է, որ եթե վերջինիս արարքը քրեորեն հետապնդելի չէ, ինչպես ՀՔԿ-ից են հայտնել, ապա ինքը նույնպես անպատիժ կմնա։
Նելլի Մելքոնյան
