Առյուծի անեկդոտը հիշեցի․ Փաշինյանը՝ ԼՀԿ-ական պատգամավորին. ՏԵՍԱՆՅՈՒԹ

Ազգային ժողովի «Լուսավոր Հայաստան» խմբակցության պատգամավոր Արկադի Խաչատրյանի համոզմամբ՝ Կառավարության ծրագրում չափելի թվերի բացակայության պարագայում գործադիրը կարող է հաշվետու չլինել Ազգային ժողովին, ինչի հետ համամիտ չէ վարչապետ Փաշինյանը։

«Մենք ունենք կառավարության տարեկան զեկույցը ծրագրի կատարման ընթացքի վերաբերյալ: Ունենք բյուջեի կատարողականը, բյուջեի նախագիծը, ունենք հարցուպատասխանի ռեժիմը: Խմբակցությունները կարող են հարցապնդումներով հանդես գալ»,- պնդում է վարչապետը, ինչին ի պատասխան պատգամավոր Խաչատրյանը հարցադրում է հնչեցնում․«Եթե վաղը որևէ նախարարություն այսպիսի ծրագիր ներկայացնի, դա ձեզ համար չափելի կլինի՞»։

Ըստ պատգամավորի՝ Կառավարության ծրագրում որպես առաջնահերթություն նշված է, որ որևէ ծրագրի համար պետք է սահմանվեն վերջնական կամ թիրախային այնպիսի ցուցանիշներ, ներառյալ ժամկետներ, որոնք կլինեն չափելի, հետևաբար, եթե կառավարությունն այդպիսի առանցքային մոտեցում ունի, ինչո՞ւ անհրաժեշտ չի համարել չափելի ցուցանիշները ներառել իր ծրագրում:

Պատգամավորի դիտարկմանն ի պատասխան՝ Նիկոլ Փաշինյանն ասաց. «Եթե ասվում է որ Հայաստանում 2023թ. ծայրահեղ աղքատություն չպետք է լինի, դա չափե՞լի է, թե՞ չափելի չէ: Ավելի կոնկրետ չի լինում: Ենթադրենք՝ գրեինք, որ աղքատությունը պետք է կրճատվի 7 տոկոսով։ Մեր գործունեության արդյունքում կրճատվեր 6 տոկոսով, ի՞նչ պիտի անեիք, հայտարարեիք, թե կառավարությունը վա՞տ է աշխատում, թող հրաժարական տա՞: Կամ գրել ենք, ծայրահեղ աղքատություն չպիտի լինի, բայց մեր գործունեության արդյունքում պարզվի, որ 5 % աղքատություն կա: Պիտի ասեք՝ վատ է, որ 95 տոկոսով կրճատվել է, 5 %, դեռ կա»:

Փաշինյանը նշեց, որ «Լուսավոր Հայաստանի» պատգամավորների ելույթը լսելիս հիշում է առյուծի մասին անեկդոտն ու պատմեց այն․ «Երբ հարցնում են՝ պատկերացրու անապատում առյուծը հետևիցդ ընկնի ի՞նչ կանես, պատասխանում է՝ ծառը կբարձրանամ, ծառ չկա, սարը կբարձրանամ, սար չկա: Պատասխանողը բարկանում է՝ հիմա դու ում կողմից ես. ի՞մ, թե՞ առյուծի: Հիմա ձեր ուզածն ի՞նչ է, որ այդ փոփոխությունը լինի՞, թե՞ չլինի»:

Մանրամասները՝ տեսանյութում։

Աղավնի Սուքիասյան