03.09.2026 | 23:17
Հայտնի են Ֆրանսիայի դեսպանատան ընդունելությունից հետո գրանցված թունավորման հնարավոր պատճառները. ՍԱՏՄ-ն մանրամասնել է
Կառավարության ծրագիրը զերծ է գաղափարական հենքից. ՀՅԴ ներկայացուցիչ. ՏԵՍԱՆՅՈՒԹ
Քաղաքականություն
13.02.2019 | 15:05
Կառավարության այս ծրագիրը զերծ է գաղափարական հենքից: Փետրվարի 13-ին հրավիրված ասուլիսում նման կարծիք հայտնեց ՀՅԴ մասնագիտական հանձնախմբերի համակարգող Արծվիկ Մինասյանը:
«Ծրագրի վերջնական մասում գրված է, որ այն հիմնված է «Իմ քայլը» դաշինքի նախընտրական ծրագրի վրա, որը որևէ մեկը, ես չեմ կարծում, որ հասարակության մեջ, ներառյալ՝ դաշինքից շատերը, կարող են գաղափարախոսական ծրագիր համարել: Ինչո՞ւ, որովհետև չկա ընդգծված մոտեցում, պատկերացում»,- ասաց նա։
Ըստ Մինասյանի՝ վատ է նաև այն, որ այս ծրագրի եզրափակիչ մասում անտեսված են արտախորհրդարանական քաղաքական ուժերը:
«Կարծեք թե երկրի կառավարության գործում այս ուժերը դերակատարություն չպետք է ունենան: Կարծեք թե Հայաստանը կառուցված է միայն հաղթող իշխող ուժից և խորհրդարանում ներկայացված մյուս ուժերից: Դա այդպես չէ»,- ասաց դաշնակցական գործիչը:
ՀՅԴ, ինչպես նաև արտախորհրդարանական մյուս ուժերը, ըստ Արծվիկ Մինասյանի, իրենց գործունեությամբ ցույց կտան, որ երկիրը պետք է կառավարվի բոլորի կողմից՝ գաղափարական, ծրագրային կոնկրետ առաջարկների, քննարկումների և լավագույն որոշումներ կայացնելու սկզբունքի հիման վրա:
Եվս մեկ կարևոր արձանագրում, ըստ Արծվիկ Մինասյանի, Կառավարության ծրագրի ուղենիշներում ամրագրված միտքն է, որ Կառավարության գործունեության նպատակը մրցունակ և ներառական տնտեսություն կառուցելն է:
«Այնուհետև թվարկվում է, թե այդ տնտեսությունը կառուցելու համար որոնք են կարևոր առաջնահերթ քայլերը: Ու ո՛չ ավելի, ո՛չ պակաս նշվում է, որ դրանում առաջնահերթ է համարվում արտաքին ու ներքին անվտանգության ապահովումը, Արցախի անվտանգության երաշխավորումն ու շարունակական ամրապնդումը: Խորը վերլուծության արդյունքում մենք հանգում ենք այն տեսակետին, որ սա հայտնի և հայ ժողովրդի կողմից մերժված՝ առանց Արցախի խնդրի լուծման տնտեսական առաջընթաց չի լինելու բանաձևի ներկայացումն է»,- ասաց Մինասյանը:
Նրա խոսքով՝ եթե սխալ է ձևակերպված և Կառավարությունն այդ միտքը չի ունեցել, ապա անպայման պետք է շտկումը տեղի ունենա. «Հակառակ դեպքում՝ մենք նորից վերադառնում ենք հայտնի զիջողական քաղաքականությանը, այն էլ՝ Կառավարության մակարդակով»:
Մանրամասները՝ տեսանյութում:
