03.09.2026 | 23:17
Հայտնի են Ֆրանսիայի դեսպանատան ընդունելությունից հետո գրանցված թունավորման հնարավոր պատճառները. ՍԱՏՄ-ն մանրամասնել է
Մակեդոնիան պաշտոնապես վերանվանվեց Հյուսիսային Մակեդոնիայի Հանրապետություն. Աթենքի հետ կնքված համաձայնագիրն ուժի մեջ է մտել
Քաղաքականություն
13.02.2019 | 12:17
Մակեդոնիայի անվանափոխության հարցով Աթենքի և Սկոպյեի միջև կնքված համաձայնագիրն ուժի մեջ է մտել. նախկին հարավսլավական հանրապետությունն այսուհետ կկոչվի Հյուսիսային Մակեդոնիա: ՏԱՍՍ-ի փոխանցմամբ՝ այս մասին Twitter-ում գրել է Հունաստանի ԱԳ առաջին փոխնախարար Յորղոս Կատրունգալոսը:
«Մեկնարկում է Հյուսիսային Մակեդոնիայի հետ համագործակցության և կայունության նոր դարաշրջանը»,- գրել է հույն պաշտոնյան:
Հունաստանի ԱԳՆ-ն բանավոր նոտա է հղել Սկոպյեին՝ հարևան երկրի արտաքին քաղաքական գերատեսչությանը տեղեկացնելով, որ հունական խորհրդարանը վավերացրել է Մակեդոնիայի անվանափոխության համաձայնագիրն ու ՆԱՏՕ-ին Հյուսիսային Մակեդոնիայի անդամակցության մասին արձանագրությունը:
Հյուսիսային Մակեդոնիայի ԱԳ նախարար Նիկոլա Դիմիտրովն իր հերթին Twitter-ում գրել է. «Թող այս օրը Հունաստանի և Հյուսիսային Մակեդոնիայի միջև երկարատև բարեկամության սկիզբ լինի: Մենք չենք կարող փոխել մեր անցյալը, բայց կարող ենք և կձևավորենք մեր ապագա բարեկամությունը, գործընկերությունն ու համագործակցությունը»:
Հիմա Հյուսիսային Մակեդոնիան պետք է նամակներ ուղարկի ՄԱԿ և միջազգային այլ կազմակերպություններ, որոնց անդամակցում է, տեղեկացնելու, որ այսուհետ կոչվում է Հյուսիսային Մակեդոնիայի Հանրապետություն:
