Ծառուկյանի օբյեկտների նկատմամբ պետական մարմինների կողմից անհարկի ուշադրություն կա. Գևորգ Պետրոսյան. ՏԵՍԱՆՅՈՒԹ

Factor.am-ի հարցազրույցը «Բարգավաճ Հայաստան» խմբակցության պատգամավոր Գևորգ Պետրոսյանի հետ

– Պարո՛ն Պետրոսյան, վարչապետ Նիկոլ Փաշինյանը Կառավարության ծրագիրը ներկայացնելիս հայտարարեց Հայաստանում տնտեսական հեղափոխության մեկնարկի մասին: Կառավարության ծրագրի ո՞ր դրույթներն են տնտեսական հեղափոխություն ապահովելու:

– Ես շահագրգիռ եմ, որ այս ծրագիրն իսկապես ազդարարի տնտեսական հեղափոխության մեկնարկը, բայց այս վիճակում այն չի հավակնում այդպիսին լինել։ Իհարկե՝ նկատելի է կառավարության ջանքը՝ փորձել մեկ քայլ առաջ անել, և իր գործունեությամբ ու արդյունքներով տարբերություն արձանագրել նախորդ կառավարությունների նկատմամբ, բայց ծրագրում բազմաթիվ են անորոշ դրույթները: Իմ կարծիքով՝ հիմնականում պետք է գերակայի պարտականությունների մասը՝ կառավարության պարտականությունը ժողովրդի առաջ, իսկ այդ պարտականությունները չկատարելու կամ ոչ պատշաճ կատարելու դեպքում իրավական ինչ հետևանքներ պետք է լինեն:

– Այսինքն՝ ծրագրում պետք է նշված լինի, թե ծրագիրը չկատարելու դեպքում Կառավարությունն ինչ պատասխանատվություն պետք է ունենա։

– Այո՛, ծրագրում չկա այդ երաշխիքը:

– Եթե Կառավարությանը չհաջողվի հինգ տարվա ընթացքում կատարել իր ծրագիրը, ի՞նչ պատասխանատվություն պետք է կրի:

– Աշխարհում ընդունված է, որ կառավարությունների պատասխանատվությունը հրաժարականն է, բայց ես հիմա չեմ ուզում նման հայտարարությամբ հանդես գալ: Նոր ձևավորված Կառավարություն է, և մենք շահագրգիռ ենք, որ հաջողի: Բայց ժողովրդին երաշխիքներ են պետք։ Նիկոլ Փաշինյանը հայտարարեց, թե մենք պետք է հասնենք նրան, որ 2023 թ. Հայաստանում ծայրահեղ աղքատություն չլինի: Բայց ժողովրդի մոտ ավելի վստահություն ստեղծելու համար չէ՞ր կարելի մեկ տարի անց խոստանալ այսքան նվազում, երկու տարի անց՝ մեկ այլ չափի: Ծրագիրը պետք է չափելի լինի: Պարոն Փաշինյանն ասաց, որ միտումնավոր ժամկետներ չեն նշել, բայց ես չեմ հասկանում, թե ինչպես կարելի է ներկայացնել ծրագիր՝ առանց ժամկետների: Ժամկետն էլ է երաշխիք:

– Ձեր կուսակցության և խմբակցության դեպքում կարծիքներ են հնչում, որ արմատական ընդդիմություն չեք և իշխանությունների նկատմամբ ունեք չափավոր ընդդիմադիր կեցվածք:

– Այդ կարծիքի հեղինակներն իրենց կարծիքի հետ մենակ են: Ժողովուրդը տեսնում է, թե ով որքան է իրականացնում իր պատգամավորական առաքելությունը։ Բայց ընդդիմությունն այն չէ, որ ամեն ինչին դեմ քվեարկի: Եթե Կառավարությունը նախագիծ բերի, որ նվազագույն աշխատավարձը դարձնելու է 100.000 դրամ, մենք պետք է դե՞մ քվեարկենք:

– Նաև կարծիք կա, որ ձեր զգուշավորությունը պայմանավորված է ԲՀԿ ղեկավար Գագիկ Ծառուկյանի՝ խոշոր գործարար լինելով:

– Բացարձակ դրա խնդիրը չկա: Եթե ես նման հայտարարություն անեմ, կնշանակի, որ վիրավորում եմ գործող Կառավարությանը: Երկրում կան այլ անձանց պատկանող օբյեկտներ, և ավելի լավ կլինի, որ Կառավարությունը դրանց նկատմամբ ուշադրություն դարձնի:

– Գագիկ Ծառուկյանին պատկանող օբյեկտների նկատմամբ ավելի՞ մեծ ուշադրություն կա:

– Այո՛, անհարկի ուշադրություն կա: Կարող են ստուգել, ասենք, լողավազանի օգտագործման պայմանները՝ մոռանալով մի շարք անձանց հանքարդյունաբերական բիզնեսը։

– Ո՞ւմ նկատի ունեք:

– Չեմ ուզում անուններ տալ: Եթե տվյալ մարդիկ անուններ են տալիս, մենք էլ իրենց անուններն ենք հնչեցնում: Թե՛ ոստիկանությունը, թե՛ ԱԱԾ-ն, թե՛ ՊԵԿ-ը շատ լավ գիտեն՝ ով ինչով է զբաղվում: Ամեն դեպքում՝ ողջունելի կլինի բոլորի նկատմամբ հավասար վարչարարության կիրառումը, հակառակ դեպքում՝ չեմ կարծում, թե «Իմ քայլը» դաշինքում կամ «Լուսավոր Հայաստանում» բոլորն աղքատ են, և ամբողջ ԱԺ-ում միայն Գագիկ Ծառուկյանն ունի սեփականություն:

Հարցազրույցն ամբողջությամբ՝ տեսանյութում

Արմինե Ավետյան