Ուզում ենք դատական համակարգը թողնենք իր յուղով տապակվի, որ հասկանանք՝ ի՞նչ «բլյուդա» կստացվի. ՀՀ վարչապետ. ՏԵՍԱՆՅՈՒԹ

Ազգային ժողովի «Իմ քայլը» խմբակցության պատգամավոր Հովհաննես Իգիթյանն այսօր խորհրդարանում ՀՀ վարչապետ Նիկոլ Փաշինյանից հետաքրքրվեց՝ արդյոք ՄԻԵԴ-ից ստացված որոշումների հետևանքով առաջացած ֆինանսական բեռը կրելու գործընթացին չպե՞տք է մասնակից լինեն թերացած դատավորներն ու նախաքննական մարմինները։

Պատգամավորի հարցին ի պատասխան՝ Նիկոլ Փաշինյանը նկատեց, որ ցանկացած առաջարկ ենթակա է քննարկման, սակայն պետք է առաջարկվող փոփոխություններն իրականացվեն զգուշավոր։

«Կարծում եմ նաև, որ այդ գաղափարները քննարկելիս պետք է լինենք մաքսիմալ բալանսավորված, որ կառավարման համակարգում չառաջանան ճեղքեր և խորշեր ու ստացվի այնպես, որ վատ դատական համակարգ չունենալու փոխարեն մենք ընդհանրապես դատական համակարգ չունենանք։ Այսօր ՀՀ-ի Ազգային ժողովն ու ժողովուրդն ունի տեսական հնարավորություն այդ դատական համակարգը ցրելու և նորից հավաքելու։ Բայց մենք պե՞տք է գնանք այդ ճանապարհով։ Երկար տարիներ արձանագրումը եղել է այսպես, որ օրենսդրական պայմանները դատական համակարգի անկախության համար կա, մնում է միայն քաղաքական կամքը, հիմա մենք ուզում ենք այդ կամքը ցուցաբերել։ Ուզում ենք դատական համակարգը թողնենք իր յուղով տապակվի, որ հասկանանք՝ ի՞նչ «բլյուդա» կստացվի։ Եթե կտեսնենք, որ այդ ստացված համակարգը սպասարկում է ՀՀ ժողովրդին, Սահմանադրությանը, պետությանը, մենք կանենք մեր հետևությունները, եթե պարզենք՝ էդպես չէ, մենք այս դահլիճում ունենք բոլոր լծակներն այդ հարցը լուծելու համար, սակայն առաջարկում եմ գնալ այն ճանապարհով, որ ունքը շինելու փոխարեն աչքն էլ չտանք հանենք»,- ասաց վարչապետը։

Նիկոլ Փաշինյանը հարցադրում հնչեցրեց արդյոք օրենսդրորեն հնարավոր է, որ ԱԺ-ն ստեղծի Քննիչ հանձնաժողով և քննի դատավորների ունեցվածքը: «Ես չգիտեմ, սա համպատրաստի միտք է։  Խորհրդարանում կան բազմաթիվ լծակներ, Կառավարությունն էլ դեմ չէ և խորհրդարանին ամբողջ ծավալով կաջակցի»։

Մանրամասները՝ տեսանյութում։

Աղավնի Սուքիասյան