18.01.2026 | 19:11
Խուսափեք երրորդ կողմերի միջամտությունից և հավելյալ վճարներից․ ՀՀ-ում ԱՄՆ դեսպանատնից զգուշացնում են
«Մենք չունենք տարածքներ տալու»․ «Իմ քայլը»-ի պատգամավորը՝ հակառակին պատրաստ գործիչներին պատրաստ է հանձնել Ադրբեջանին. ՏԵՍԱՆՅՈՒԹ
Քաղաքականություն
11.02.2019 | 20:10
«Իմ քայլը» խմբակցության պատգամավոր Սոֆյա Հովսեփյանը երեկ ֆեյսբուքյան էջով առաջարկել է «Հայ Ազգային Կոնգրեսի» փոխնախագահ Լևոն Զուրաբյանին փոխանակել Դաշտային Արցախի հետ։ Պատգամավորին դուր չի եկել, որ պարոն Զուրաբյանը ադրբեջանական լրատվամիջոցի հետ խոսել է փոխզիջումային լուծումներից, որոնցից մեկը ենթադրում է ազատագրված հողերի վերադարձ:
«Ես ոչ թե խնդիր ունեմ այդ անձի հետ, այլ ես ունեմ խնդիր այդ մոտեցման հետ»,- Factor-ի հետ զրույցում ասում է ԱԺ «Իմ քայլը» խմբակցության անդամ Սոֆյա Հովսեփյանը։
Տիկին Հովսեփյանի համար անընդունելի է ընդհանրապես Ղարաբաղի զինված ուժերի հսկողության տակ գտնվող տարածքների ցանկացած դեպքում զիջելու տարբերակը․ «Դուրս է գալիս, որ մենք կորցնում ենք զինվորին, արյունը թափվում է, և կորցնելու ենք մենք հող»։
Պատգամավորին դուր չի գալիս Լևոն Տեր-Պետրոսյանի թիմակիցների պատկերացումները արցախյան խնդրի լուծման մասին։ Ինքը վստահ է, որ մենք պատերազմ ենք հաղթել և մեր խնդիրն է Ադրբեջանին ստիպել հաշտվել այդ մտքի հետ, մենք զիջելու ոչինչ չունենք:
«Մենք արդեն իսկ զիջեցինք Նախիջևանը, այսօր մեր թշնամին հասել է Խաչիկ գյուղի սահման, մենք արդեն զիջել ենք մի մեծ հատված, մենք զիջել ենք Արծվաշենը»,-թվարկում է իշխանական պատգամավորը։
Հարցի լուծման միայն մի տարբերակ է տեսնում Սոֆյա Հովսեփյանը՝ պահպանել այն, ինչ կա, և խաղաղությունը ամրագրել գործող սահմաններով, այս մասին, ըստ նրա, Նիկոլ Փաշինյանն էլ է խոսել:
«Երբ հարցը վերաբերեց փոխզիջումներին, պարոն Փաշինյանը շատ հստակ ասաց, որ ինչ փոխզիջման մասին է խոսքը, մենք խոսում ենք փոխզիջումից, ինչի մասին է խոսքը՝ եթե մենք չունենք տարածքներ տալու և ունենք մենք հաղթած պատերազմ և ունենք հաղթած հայրենիք»,- վստահեցնում է պատգամավորը։
Տիկին Հովսեփյանը երբեք չի մոռանա, թե ինչ գնով է ձեռք բերվել արցախյան հաղթանակը, ինքը այդ ժամանակ մանկություն է կորցրել, իսկ Հայաստանը՝ արդյունաբերություն։ Բայց ինքը մեծահոգի է․ «Ես կարող եմ դրանք ներել, ինչո՞ւ, որովհետև ես այսօր ունեմ հնարավորություն և արդյունաբերություն ստեղծելու, և բանակցելու, և բերելու ներդրումներ անելու»։
Պատգամավորի պատկերացումներին այսօր անդրադարձել է նաև Արցախի նախկին արտգործնախարար Արման Մելիքյանը։ Նա ակնարկել է, որ պատգամավորը դեռ կարիք ունի հղկելու իր քաղաքական իմացությունը Ղարաբաղի հարցի և Լևոն Զուրաբյանի մասին։
«Սա քաղաքական մոտեցում չէ, մենք մեծ հաշվով չպետք է հայրենիքի դավաճաններ փնտրենք մեր շարքերում, որովհետև ես վստահ եմ թե ձեր հիշատակած պատգամավորը, թե Լևոն Զուրաբյանը Հայաստանի, մեր հայրենիքի նկատմամբ պատկառանք ու սեր են տածում և ամեն մեկն իր տեղում թող իր գործը լավ անի»,- ասում է ԱՀ նախկին արտգործնախարար Արման Մելիքյանը։
Ի դեպ, Սոֆյա Հովսեփյանի ֆեյսբուքյան գրառումը հավանել էր «Իմ քայլը» խմբակցության անդամ Վարազդատ Կարապետյանը։ Ինքը, պարզվում է, գրառումը հավանել է վերապահումով, քանի որ Լևոն Զուրաբյանին հաստատ չի զիջի Դաշտային Արցախի դիմաց։
«Լևոն Զուրաբյանին անձամբ ծանոթ չեմ, գտնում եմ, որ նա մեծ ներդրում ունի ՀՀ պետականության կայացման մեջ և չեմ կարծում, որ նրան կարելի է զիջել ինչ-որ բանի դիմաց»,- ժպտում է ԱԺ «Իմ քայլը» խմբակցության անդամ Վարազդատ Կարապետյանը։
Պարոն Կարապետյանը շեշտել է, որ հարգում է իր գործընկերոջ կարծիքը, իսկ Արցախի հարցի լուծման մասով դեռ պետք է լսել Հայաստանի բոլոր քաղաքացիներին։
Մհեր Արշակյան
