Բացառված չէ, որ Տիգրան Ավինյանի միտքն այն մասին, որ ընդդիմությունը կծնվի հենց իշխանությունում, իրականություն դառնա․ քաղտեխնոլոգ

Քաղտեխնոլոգ Կարեն Քոչարյանը պետական կառավարման ապարատում վերջին շրջանում տեղի ունեցող կադրային փոփոխությունները որոշակի զտման գործընթաց է համարում և շեշտում՝  իշխող կուսակցությունը միասնական գաղափարախոսություն չունի, ինչը գնալով նրանց համար դառնում է խնդրահարույց, որով էլ պայմանավորված տեղի են ունենում կադրային նման փոփոխություններ։

«Կադրերի որոշակի զտում է կատարվում։ Զտվում են նրանք, ովքեր այս ամիսների ընթացքում չկարողացան կամ ցանկություն չունեցան որևէ բան սովորել: Չնայած դրան՝ բացառված չէ, որ փոխվարչապետ Տիգրան Ավինյանի միտքն այն մասին, որ ընդդիմությունը կնծվի հենց իշխանությունում, կարող է իրականություն դառնալ», – ասաց Քոչարյանը։

Քաղտեխնոլոգը վստահեցնում է՝ Նիկոլ Փաշինյանի՝ ակտիվ քննադատվող կադրային քաղաքականությունն իրականում որոշակի տրամաբանություն և կշռադատվածություն ունի:

«Մասնավորապես, դա վերաբերում է նրան, որ առանցքային նախարարություններում և գերատեսչություններում  լուրջ կադրային փոփոխություններ չեն կատարվել: ԿԲ-ում, Ֆինանսների նախարարությունում, ՊԵԿ-ում, ինչպես նաև ուժային կառույցներում փաստացի կադրերը չեն փոխվել: Նման հաջորդականությունը թույլ տվեց պետական կառավարման համակարգի կոլապսից խուսափել», – նկատեց քաղտեխնոլոգը։

Անդրադառնալով  երկրում արմատական ընդդիմության բացակայությանը՝ Կարեն Քոչարյանը նշեց, որ  այդ վակուումը կլրացվի։

«Խորհրդարանում այդ դերը կատարում է «Լուսավոր Հայաստան» խմբակցությունը։ Ոչ խորհրդարանական ընդդիմությունում նման ուժեր էլ չկան․ խոսքը վերաբերում է և՛ ՀՀԿ-ին, և՛ մյուս ուժերին։  Նրանց մի մասն արդեն հայտարարել է նոր կուսակցություններ ստեղծելու մասին, մյուս մասը՝ պատրաստվում է անել դա։ Այդ նոր ձևավորված ուժերից է  «Ազգային օրակարգ»-ը,  որի ներկայացուցիչներն արդեն ակտիվ գործունեություն են ծավալում ցանցում։ Այդ ուժերը հիմնականում պահպանողականության կամ նեոպահպանողականության կողմնակիցներն են։ Սա վկայում է այն մասին, որ առաջիկա տարիներին հասարակությունում լինելու է նման քաղաքական ուժերի պահանջարկ»,- ընդգծեց քաղտեխնոլոգը։

Աղավնի Սուքիասյան