Ունենք ոչ անկախ դատական համակարգ, որը շատ ժամանակ սպասում է հրահանգի․ փաստաբան․ ՏԵՍԱՆՅՈՒԹ

Դատական համակարգում լուրջ փոփոխություններ ակնկալելու համար հեղափոխության փաստը բավարար չէ․ այստեղ անհրաժեշտ են լուծումներ, որոնք ավելի բարդ գործընթացներ են, ուստի հեղափոխությունից հետո մենք ունենք այնպիսի համակարգ, որը ժառանգել ենք նախորդներից։

Այս մասին այսօր հրավիրված մամուլի ասուլիսի ժամանակ ասաց փաստաբան Դավիթ Գյուրջյանը՝ նշելով, որ արդարադատության համակարգը մաքրելու խնդիր ունենք այն դատավորներից, որոնք չեն կարողանում անկախ գործել։

«Մենք ունենք ոչ անկախ դատական համակարգ, որը դեռևս ի զորու չէ աշխատել անկախ, շատ ժամանակ սպասում է հրահանգի և չի կողմնորոշվում անկախ գործելաոճ չունենալու պատճառով։ Դրան ականատես եղանք, երբ քննվում էր Ռոբերտ Քոչարյանին կալանավորելու գործը։ Այսինքն՝ այստեղ մենք ունենք տոտալ բարեփոխումների և լյուստրացիայի խնդիր, որպեսզի համակարգը մաքրվի այն դատավորներից, որոնք չեն կարող պարզապես անկախ գործել՝ անգամ իշխանափոխության և իշխանության կողմից հրահանգ չլինելու պարագայում»,- ասաց փաստաբանը՝ շեշտելով, որ հեղափոխությունից հետո դատական համակարգում գրեթե բան չի փոխվել բացառությամբ գրավի կիրառելիության հարցը։

«Ավելի հաճախ են սկսել գրավ կիրառել․ դա էլ իր պատճառն ունի։ Ըստ էության՝ այն գործերը, որոնցով նախորդ իշխանության պայմաններում կլինեին մարդկանց կալանավորելու հրահանգներ, այդ հրահանգներն այժմ չկան»,- նշեց Գյուրջյանը։

Վերջինիս խոսքով ՝ արդարադատության համակարգի լյուստացիան, երբ հին դատավորների կազմը պետք է փոփոխության ենթարկվի, կարելի է իրականացնել կամ դիտարկել անցումային արդարադատության շրջանակում։

Մանրամասները՝ տեսանյութում։

Աղավնի Սուքիասյան