Սպորտի և երիտասարդության հարցերի նախարարության ճակատագիրը մնաց օդում. «Ժողովուրդ» 

«Ժողովուրդ» թերթը գրում է.

ՀՀ կառավարության կառուցվածքի վերաբերյալ քննարկումներն ավարտվել են: Թեև չի ներկայացվել ՀՀ կառավարության կառուցվածքի և գործունեության մասին օրենքում փոփոխությունների նախագիծը, սակայն երեկ գործադիրը հրապարակեց 12 նախարարությունների անունները:

Ըստ այդմ, առաջիկայում կառավարությունը կունենա հետևյալ կազմը.

Արտաքին գործերի նախարարություն,

Պաշտպանության նախարարություն,

Արտակարգ իրավիճակների նախարարություն,

Արդարադատության նախարարություն,

Աշխատանքի և սոցիալական հարցերի նախարարություն,

Կրթության, գիտության և մշակույթի նախարարություն,

Բնապահպանության նախարարություն,

Առողջապահության նախարարություն,

Ֆինանսների նախարարություն,

Էկոնոմիկայի նախարարություն,

Տարածքային կառավարման և ենթակառուցվածքների նախարարություն,

Բարձր տեխնոլոգիաների արդյունաբերության նախարարություն:

Ինչ վերաբերում է Սփյուռքի նախարարությանը, ապա դրա փոխարեն այսուհետ կստեղծվի Սփյուռքի գործերի գլխավոր հանձնակատարի պաշտոն վարչապետի աշխատակազմում:

Փաստորեն, ներկայիս 17 նախարարության փոխարեն կունենանք 12-ը: Ընդ որում, տեղի է ունեցել ոչ թե սոսկ միավորման գործընթաց, այլև որոշ նախարարությունների դեպքում կատարվել է անվանափոխություն: Չկա Տնտեսական զարգացման և ներդրումների նախարարությունը, և այս գործառույթները կիրականացնի Էկոնոմիկայյի նախարարությունը: Տարածքային կառավարման և զարգացման նախարարության փոխարեն կլինի Տարածքային կառավարման ու ենթակառուցվածքների նախարարություն, որի կազմում, ամենայն հավանականությամբ, կընդգրկվեն Գյուղատնտեսության նախարարությունը, նաև նրանց լիազորության շրջանակներում կլինի տրանսպորտի և կապի ոլորտները՝ որպես առանձին ենթակառուցվածքներ: Իսկ ՏՏ ոլորտով կզբաղվի Բարձր տեխնոլոգիաների արդյունաբերության նախարարությունը:

Մեկ հետաքրքիր փաստ էլ. եթե այս փոփոխությունների արդյունքում Մշակույթի նախարարությունը միացվելու է ԿԳՆ-ին, ապա հայտնի չէ Սպորտի և երիտասարդության հարցերի նախարարության ճակատագիրը. համենայն դեպս, 12 նախարարություններից որևէ մեկի անվանումից պարզ չէ, թե ով է զբաղվելու այդ հարցերով:

Առավել մանրամասն՝ թերթի այսօրվա համարում: