10.06.2026 | 21:40
Թրամփը շնորհավորել է Փաշինյանին
Պետնախարարը Նորագյուղում մասնակցել է համայնքային խորհրդակցության
Քաղաքականություն
08.02.2019 | 22:00
Արցախի Հանրապետության պետական նախարար Գրիգորի Մարտիրոսյանը փետրվարի 8-ին Ասկերանի շրջանի Նորագյուղ համայնքում մասնակցել է համայնքի հաշվետու ժողովին։
ԱՀ պետական նախարարի աշխատակազմի տեղեկատվության և հասարակայնության հետ կապերի բաժնի փոխանցմամբ՝ միջոցառմանը ներկա է եղել նաև Ասկերանի շրջանի վարչակազմի նորանշանակ ղեկավար Հակոբ Ղահրամանյանը։
Խորհրդակցության ժամանակ Նորագյուղ համայնքի ղեկավար Էդիկ Մարդյանը ներկայացրել է 2018 թ․-ի տարեկան հաշվետվությունը։ Համայնքի ձեռքբերումների շարքում Է․ Մարդյանն առանձնացրել է նախորդ տարի սեփական եկամուտների գերակատարումը, պետական միջոցներով Նորագյուղ-Իվանյան միջհամայնքային ճանապարհահատվածի ասֆալտապատումը, որն էական աշխուժություն է մտցրել համայնքի կյանքում։ Սրանից զատ՝ նախորդ տարում պետության ստանձնած սոցիալական պարտավորության շրջանակներում կառուցվել, ձեռք է բերվել և շահառուներին նվիրվել 1-ական բնակարան, ևս 1-ի կառուցումն ընթացքի մեջ է։ Նորագյուղի ժողովրդագրական ցուցանիշները թվարկելիս Է․ Մարդյանը հիշատակել է նաև, որ նախորդ տարի գյուղում գրանցվել է մեխանիկական աճ․ Երևանից 2 ընտանիք մշտական բնակության է տեղափոխվել համայնք։ Ներկայումս գյուղի դպրոցում սովորում է 258 աշակերտ, որից 28-ը՝ առաջին դասարանցի։ Զեկույցի ավարտին համայնքի ղեկավարը բարձրացրել է գյուղի ոռոգման ջրի և փողոցային լուսավորության հարցերը։
Պետնախարար Գրիգորի Մարտիրոսյանը ելույթի սկզբում ներկայացրել է գյուղատնտեսական ոլորտում կառավարության հիմնական ծրագրերը։ Հասցեական անդրադառնալով Նորագյուղի գյուղատնտեսական իրականությանը՝ պետնախարարը նշել է, որ այսուհետ 250 և ավելի մ² մակերես ունեցող ջերմոցների յուրաքանչյուր 250 մ-ի համար պետությունը տնտեսվարողին անհատույց աջակցության եղանակով տրամադրելու է 50000 ՀՀ դրամի չափով միանվագ աջակցություն։
Խոսելով ոռոգման ջրի խնդրի մասին՝ պետնախարարը հավաստիացրել է, որ հարցն ուսումնասիրության փուլում է, և կառավարությունը մտադիր է այն լուծել կա՛մ հին ջրամբարի վերանորոգման, կա՛մ նորի կառուցման միջոցով։ «Անհրաժեշտության դեպքում կդիտարկենք նաև արտեզյան ջրհորի կահավորման հարցը»,- հավելել է Գ․ Մարտիրոսյանը։ Փողոցային լուսավորության հարցում պետնախարարը հայտնել է կառավարության աջակցությունը՝ հավաստիացնելով, որ հարցը վերջնական լուծում կստանա։
Խորհրդակցության ավարտին Գ․ Մարտիրոսյանը պատասխանել է ներկաների հարցերին։
