«Օսիպյանն իր դուխով ցուցմունքով մի քանի տասնյակ մարդկանց ուղարկեց բանտ». համաներումը «Սասնա ծռերի» վրա չի տարածվի

ՀՀ ոստիկանապետ Վալերի Օսիպյանը «Սասնա ծռեր» խմբի 10 անդամի գործով փետրվարի 6-ի դատական նիստին հայտարարեց, որ դեմ է, որպեսզի խմբի անդամների նկատմամբ համաներում կիրառվի:

«Համաներման մասին» օրենքի՝ «Սասնա ծռերին» վերաբերվող հատվածում նշված է, որ այն չի տարածվի խմբի անդամների վրա, եթե պատանդառված և ֆիզիկական վնաս կրած անձինք առարկում են դրա դեմ:

Factor.am-ի հետ զրույցում փաստաբան Արայիկ Պապիկյանը, հեգնելով ոստիկանապետի որոշումը, ասաց. «Փառք ու պատի՜վ պարոն Օսիպյանին, որ նա մի քանի տասնյակ անձանց իր դուխով ցուցմունքի շնորհիվ կարողացավ բանտ ուղարկել»:

Հիշեցնենք, որ ներկայիս ոստիկանապետը 2016 թվականին՝ ՊՊԾ գնդի գրավման օրերին, Երևանի ոստիկանապետի տեղակալն էր: Նա մի քանի օր ՊՊԾ գնդում գտնվել է պատանդի կարգավիճակում, և նրա ցուցմունք այս գործով որոշիչ էր: Փաստաբան Արայիկ Պապիկյանն ասաց, որ եթե նույնիսկ ֆիզիկական վնաս կրած մեկ տուժող առարկեր համաներման դեմ, ապա այն չէր կիրառվի «Սասնա ծռեր» խմբի անդամների նկատմամբ:

Ստացվում է, որ այս գործով դատական նիստերը կշարունակվեն՝ մինչև դատավճռի հրապարակումը, որից հետո «Սասնա ծռեր» խմբի անդամները դատարանի սահմանած պատժաչափով կենթարկվեն պատասխանատվության: Մինչդեռ համաներման դեպքում գործով անցնողների նկատմամբ պատիժը չէր կիրառվի:

«Խմբի անդամների մեջ կան մարդիկ, որոնց առաջադրված է հինգ-վեց մեղադրանք՝ ծանր, առանձնապես ծանր հանցագործությունների առումով և, դիցուք, կարող են 20 տարի ժամկետով ազատազրկման պատիժներ սահմանվել գործը քննող դատարանի և գործը բերած դատախազության կողմից: Այդ ուղիով էլ նրանք գնալու են»,- ասաց Պապիկյանը:

Լիլիթ Շաբոյան