Մինաս Ավետիսյանի որդին բարձրաձայնում է՝ «Գիշեր» որմնանկարը կործանման եզրին է

Մինաս Ավետիսյանի՝ Ջաջուռի թանգարանի տնօրեն Արման Ավետիսյանը, որը մեծանուն նկարչի որդին է, ահազանգում է, որ Գյումրիի գործարաններից մեկի պատին նկարված Մինաս Ավետիսյանի «Գիշեր» որմնանկարը կործանման եզրին է:

Արման Ավետիսյանը նշում է, որ գրավոր դիմել են վարչապետին, Մշակույթի նախարարությանը,  սակայն ոչ մի դրական պատասխան չի ստացել։

«ՀՀ մշակույթի նախարարության ծրագրերից մեկի շրջանակում Մինասի ութ որմնանկար է ամրակայվել և փրկվել: Մնացել էր վերականգնել «Գիշեր» գործը,  որն ամենավատ վիճակում է: Հերթը դրան չէր հասնում, քանի որ  կազմակերպությունները, անհատները, որոնք վճարում էին որմնանկարը  տեղափոխելու համար, առաջին հերթին աշխատում էին պատից հեռացնել և վերականգնել այն գործերը, որոնք ավելի քիչ էին վնասված»,- ասաց Արման Ավետիսյանը:

Ըստ Արման Ավետիսյանի՝ երբ հայ մասնագետները «Գիշեր» որմնանկարը  վերականգնելու նպատակով կտրել, հանել էին որմնանկարի մի մասը, լուր են ստանում, որ լաբորատորիան, որտեղ այն պետք է վերականգնվի, փակվել է, և աշխատանքներն այլևս չեն կարող  ֆինանսավորվել:

«Վերականգնողները պատից հանված կտորները դնում են պատի տակ ու մեկնում Երևան՝ պարզելու, թե ինչ հարցեր են ծագել: Երբ վերադառանում են, տեսնում են, որ այդ կտորները գրեթե ոչնչացվել են` ընկնելով ոտքի տակ» ներկայացրեց Ավետիսյանը։

Վերջինիս խոսքով՝ վերջին անգամ անցյալ տարի ամռանն են բարձրաձայնել որմնանկարի պահպանման հարցը:

«Հանդիպել եմ ՀՀ մշակույթի նախարար Լիլիթ Մակունցին, բայց այդ ժամանակ նախարարությունը չէր կարող որևէ ծրագիր իրականացնել այդ ուղղությամբ»,- նշեց Ավետիսյանն ու հավելեց, որ նախկինում որմնանկարի պահպանության համար հաշվարկներ իրականացրել են, բայց հիմա հաշվարկը վերանայել է պետք:

«Հավանաբար, շուրջ 20-25 000  ԱՄՆ դոլար անհրաժեշտ կլինի «Գիշերը» վերականգնելու համար»,- ասաց նա:

Նշենք, որ  «Գիշերը» որմնանկարը ստեղծվել է 1973 թվականին է:

Աղավնի Սուքիասյան