18.12.2025 | 17:43
Եկել եմ Գերագույն հոգևոր խորհրդի նիստին, օրակարգը չգիտեմ. Վահան սրբազան․ ՏԵՍԱՆՅՈՒԹ
ՀՀ-ԵՄ համաձայնագրի վավերացման համար քաղաքական որևէ խոչընդոտ չկա. Արման Եղոյան. ՏԵՍԱՆՅՈՒԹ
Քաղաքականություն
08.02.2019 | 11:08
Հայաստան-Եվրամիություն համաձայնագրի վավերացման համար քաղաքական որևէ խոչընդոտ չկա: Փետրվարի 8-ին ՀՀ Ազգային ժողովում լրագրողների հետ զրույցում ասաց Եվրաինտեգրման հարցերի հանձնաժողովի նախագահ, «Իմ քայլը» խմբակցության պատգամավոր Արման Եղոյանը՝ հիշեցնելով, որ ԵՄ անդամ 28 պետություններից 10-ն արդեն վավերացրել են փաստաթուղթը:
«ՀՀ-ԵՄ համաձայնագրի վավերացման գործընթացի հետ կապված մենք ունենք միմիայն դրական ազդակներ ԵՄ անդամ երկրների մեր գործընկերներից: 28 պետություններից 10-ն արդեն վավերացրել են, մյուս երկրներից որոշներում փաստաթուղթն արդեն խորհրդարանում է: Նաև ԵՄ դեսպան Պյոտր Սվիտալսկին է առիթ ունեցել հայտարարելու, որ որևէ քաղաքական խոչընդոտ չկա: Մեծ հաշվով՝ չեմ էլ պատկերացնում, թե ինչու պետք է լիներ»,- հավելեց Եղոյանը:
Հարցին, թե հաշվի առնելով այն տեմպը, որով վավերացվում է համաձայնագիրը, հնարավո՞ր է մոտ ժամանակներս հասնել Եվրամիության երկրների հետ ազատ վիզայի ռեժիմի, որովհետև քայլերը, կարծես, դանդաղում են, Արման Եղոյանը պատասխանեց, որ գործընթացը դանդաղել է որոշ օբյեկտիվ պատճառներով:
«Մասնավորապես՝ Եվրախորհրդարանի սպասվող ընտրությունների պատճառով, որոնք պետք է տեղի ունենան մայիսին: Այստեղ կա նաև քաղաքական օրակարգ, մասնավորապես՝ որոշակի բարեփոխումների իրականացման տեմպի մասին է խոսքը: Եվ այստեղ ես կարծում եմ, որ մեր կողմից որևէ խնդիր չի կարող լինել»,- նշեց նա:
Եվրաինտեգրման հարցերի հանձնաժողովի նախագահը, սակայն, ՀՀ-ԵՄ համաձայնագրի ամբողջական վավերացման և վիզայի ազատականացման հարցով բանակցությունների մեկնարկի ժամկետ դժվարանում է նշել:
«Ես հստակ ժամկետ չեմ կարող ասել, որովհետև դա կախված կլինի բազմաթիվ գործոններից, որոնք ես այս պահին կանխատեսել չեմ կարող: Ոչ ոք չի կարող ասել, թե, օրինակ, Եվրախորհրդարանն ընտրվելուց հետո ի՞նչ տեմպով կաշխատի կամ մեզ մոտ բարեփոխումների կիրարկումն ի՞նչ տեմպով կգնա՝ արագ, շատ արագ, թե՞ գերարագ»,- ասաց Արման Եղոյանը՝ խորհուրդ տալով կենտրոնանալ ոչ թե ժամկետների, այլ գործընթացների դինամիկայի վրա:
Մանրամասները՝ տեսանյութում:
