18.01.2026 | 21:30
Վահագն Խաչատուրյանն այցելել է Ժնևի Սուրբ Հակոբ եկեղեցի
Առողջապահության նախարարն աջակցություն է հայտնում առողջության առաջնային պահպանման մասնավոր ծառայություն մատուցողներին
Հասարակություն
07.02.2019 | 22:13
ՀՀ առողջապահության նախարար Արսեն Թորոսյանն ընդունել է առողջության առաջնային պահպանման (ԱԱՊ) ծառայություն մատուցող մասնավոր բժշկական կազմակերպությունների ղեկավարներին:
Ինչպես տեղեկացրին ՀՀ առողջապահության նախարարության հասարակայնության հետ կապերի բաժնից, Արսեն Թորոսյանը, կարևորելով նշված կազմակերպությունների աշխատանքը, շեշտել է, որ այս հաստատություններում բարեհաջող կիրառվում է ընտանեկան բժշկության մոդելը և նշել, որ ոլորտի զարգացման խթաններից մեկը կարող է հանդիսանալ այդ ուղղությամբ աշխատանքներին նոր տեմպ հաղորդելը:
«Եթե հնարավորություն ունեք ընդլայնվելու այս ոլորտում ` ես ողջունում եմ ցանկացած այդպիսի նախաձեռնություն»,- ասել է Թորոսյանը՝ հավելելով, որ գործող օրենքները թույլ են տալիս ծավալելու անկախ պրակտիկաներ և յուրաքանչյուր ոք կարող է նախաձեռնել ԱԱՊ կենտրոնի բացում, ստանալ լիցենզիա, բնակչության հավաքագրել և պետությունից ստանալ ֆինանսավորում:
Նախարարն ընգծել է, որ նախկինում արհեստական խոչընդոտներ են ստեղծվել ԱԱՊ այս մոդելի կիրառման դեպքում, և շնորհակալություն հայտնել ցուցաբերած համարձակության համար:
«Եղել են գերատեսչական շահեր, օրինակ` համայնքը, քաղաքապետարանը, նախարարությունը չեն ուզեցել կորցնել իրենց ենթակայության տակ գտնվող հաստատությունները կամ կցագրված բնակչությունը»,- ասել է նա և իր անվերապահ աջակցությունը հայտնել ԱԱՊ մասնավոր ծառայություն մատուցող բժշկական կազմակերպություններին:
Հանդիպման-քննարկման ժամանակ մասնագետները պատմել են ԱԱՊ օղակում բժշկական օգնության և սպասարկման իրենց փորձի մասին, ներկայացրել են առկա խնդիրները և առաջարկները:
