ՀԱԿ-ը Մարտի 1-ին երթ չի՞ անցկացնի․ սպասում են իշխանության քայլերին

2008 թվականի Մարտի 1-ի արյունալի դեպքերից հետո Հայ ազգային կոնգրեսի նախաձեռնած ամենամյա երթի հետ կապված կոնգրեսը սպասում է իշխանության քայլերին։

ՀԱԿ գրասենյակից Factor.am-ին հայտնեցին, որ այս տարի սպասելու են՝ կառավարությունն ինչ քայլեր կիրականացնի և իրենք կշարժվեն, ըստ այդմ:

«Տրամաբանական է, որ այս տարի պետք է իշխանությունները կազմակերպեն»,- փոխանցեցին
ՀԱԿ-ից:
Ազգային ժողովի փոխնախագահ Ալեն Սիմոնյանը Factor.am-ին տեղեկացրեց, որ իշխանության քայլերը կլինեն Մարտի 1-ի զոհերի հիշատակը հավերժացնող հուշարձանի տեղադրումը և տասը զոհերի հարազատներին փոխհատուցում տրամադրելը:

Հիշեցնենք՝ ամռանը Լենա Նազարյանն ու Ալեն Սիմոնյանը շրջանառության մեջ դրեցին «2008 թվականի մարտի 1, 2-ին Երևան քաղաքում տեղի ունեցած իրադարձությունների ժամանակ անձանց կյանքին կամ առողջությանը պատճառված վնասների հատուցման մասին» օրենքի նախագիծ։ Լենա Նազարյանը մեր հարցին ի պատասխան ասաց՝այժմ նախագիծը լրամշակվում է և առաջիկայում կրկին կդրվի շրջանառության մեջ:

Մարտի 1-ի իրադարձություններից հետո ամեն տարի Հայ ազգային կոնգրեսը երթ է անցկացրել Ազատության հրապարակից դեպի Մյասնիկյանի հրապարակ, ինչպես իրենք էին հայտարարում՝ ընդդեմ 2008 թվականի Մարտի 1-ի զոհերի հիշատակի եւ պետական ահաբեկչության ու բռնաճնշումների:

Անցած տարի լրացավ Մարտի 1-ի ողբերգության տասը տարին, այն ժամանակ ԱԺ «Ելք» խմբակցության ղեկավար, այսօր արդեն Հայաստանի վարչապետ Նիկոլ Փաշինյանը երթի ընթացքում պատասխանելով Factor.am- ի հարցերին հայտարարել էր՝ Մարտի 1-ի համար հավասարապես պատասխանատու են Հայաստանի երկրորդ և երրորդ նախագահները, ավելին՝ ընդգծել էր, որ Սարգսյանի անունը Մարտի 1-ի վրայից նույնիսկ «ժավելով» հնարավոր չէ մաքրել:

Այդ հայտարարությունից մոտ կես տարի անց, երբ արդեն Փաշինյանն էր ստանձնել երկրի ղեկավարումը, ՀՀ երկրորդ նախագահ Ռոբերտ Քոչարյանին սահմանադրական կարգը տապալելու մեղադրանք առաջադրվեց, նա այժմ գտնվում է անազատության մեջ: Երրորդ նախագահ Սերժ Սարգսյանը օրերս հայտնի դարձավ, որ հարցաքննվել է որպես վկա:
Սահմանադրական կարգի տապալման հոդվածով մեղադրանքներ են առաջադրվել նաև այն ժամանակ Պաշտպանության նախարար Միքայել Հարությունյանին, Զինված ուժերի գլխավոր շտաբի պետի պաշտոնը զբաղեցրած Սեյրան Օհանյանին, Երևանի կայազորի պետ Յուրի Խաչատուրովին և այլ նախկին պաշտոնյաների:

Շողիկ Գալստյան