Կառավարության ծրագիրը մի քանի օր է` ԱԺ-ում է. հասանելի է եղել նեղ շրջանակի անձանց համար

Փետրվարի 6-ի կառավարության նիստում գործադիրը հավանության արժանացրեց իր ծրագիրը: Այն շուտով պաշտոնապես կուղարկվի Ազգային ժողով՝ քննարկման եւ հաստատման: Factor.am-ին, սակայն, հայտնի դարձավ, որ կառավարության ծրագրի նախագիծը դեռ մի քանի օր առաջ է ուղարկվել Ազգային ժողով:

Փաստաթուղթը հասանելի է եղել օրենսդիրի մոտ մեկ տասնյակ ներկայացուցիչների միայն:

Մեր աղբյուրների փոխանցմամբ՝ կառավարության ծրագրին նախապես ծանոթացել են Ազգային ժողովի նախագահը, ՔՊ-ական փոխնախագահները, «Իմ քայլը» խմբակցության ղեկավարը, հանձնաժողովների ՔՊ-ական ղեկավարները: Ինչպես նաեւ՝ հանձնաժողովների նախագահներին Լիլիթ Մակունցի մակարդակով ասվել է, որ կառավարության ծրագրի նախագիծը քննարկեն միայն «Իմ քայլը» խմբակցության անդամների հետ:

Այս տեղեկությունների շուրջ Factor.am-ը մեկնաբանություն խնդրեց «Իմ քայլը» խմբակցության ղեկավար Լիլիթ Մակունցից: Նա, պարզաբանելով իրավիճակը, հասատեց նաեւ մեր տեղեկությունները:

«Նախագծի հետ կապված առանձին դրույթների առումով քննարկումներ եղել են, բայց ծրագրի ամբողջական փաթեթն այսօր է հրապարակային դարձել: Այո, նախնական որոշակի քննարկումներ եղել են»,- ասաց «Իմ քայլը» խմբակցության ղեկավարը:

Լիլիթ Մակունցը մեզ հետ զրույցում ասաց, որ, ամենայն հավանականությամբ, կառավարության ծրագիրը կքննարկեն փետրվարի 12-ին: ԱԺ նիստի օրը վերջնական որոշված չէ:

Նշենք, որ Ազգային ժողովի կանոնակարգ-սահմանադրական օրենքի համաձայն՝ 7-րդ գումարման Ազգային ժողովի առաջին նստաշրջանն ավարտված չի համարվում, քանի դեռ չի քննարկվել եւ ընդունվել կառավարության ծրագիրը: ՀՀ սահմանադրության 150 հոդվածի համաձայն՝ կառավարությունն իր ծրագիրն ԱԺ է ներկայացնում կառավարության ձեւավորումից հետո 20 օրվա ընթացքում: ԱԺ-ն կառավարության ծրագրին դեմ կամ կողմ է քվեարկում 7 օրվա ընթացքում:

Հայկ Վարդանյան