Սերժ Սարգսյանը եղել է ու կլինի ԼՂՀ անկախության միջազգային ճանաչման ջատագովը․ Է․ Շարմազանով

«Սերժ Սարգսյանն ու ՀՀԿ-ն եղել են ու կլինեն ԼՂՀ անկախության միջազգային ճանաչման, ԼՂՀ հարցի հայանպաստ լուծման ջատագովներն ու անվտանգության երաշխավորները»,- Factor.am-ի հետ զրույցում ասաց ՀՀԿ մամլո խոսնակ, ԱԺ նախկին փոխնախագահ Էդուարդ Շարմազանովը՝ անդրադառնալով Սերժ Սարգսյանի մասին ԼՂՀ պաշտպանության բանակի նախկին հրամանատար Սամվել Բաբայանի հայտարարությանը։

Սամվել Բաբայանը, հիշեցնենք, «Ազատություն» ռադիոկայանի հետ զրույցում ասել էր, թե «ղարաբաղցիներին հարցրեք, թե 2017թ․ Ս․Սարգսյանը ձեզ հետ ինչի՞ մասին է բանակցել»։

«Ի՞նչ զիջումներ պետք է անեիք, ո՞նց պետք է անեիք: Ղարաբաղի ղեկավարությանն այդ հարցերն ուղղեք, հիմա որ բլբլում են, ասա էն ժամանակ բլբլայիք, որ եկել էր ձեզ հետ խոսելու ու ասելու, թե ինչ է լինելու»,- ասել էր նա՝ հավելելով, որ այն ժամանակ ՀՀ երրորդ նախագահը մեծ դահլիճում հանդիպման է հրավիրել ոչ միայն Արցախի իշխանությանը, այլև՝ ակտիվիստներին:

Էդուարդ Շարմազանովը մեզ հետ զրույցում հավելեց, թե Սամվել Բաբայանի հայտարարության մասին արդեն խոսել են ԼՂՀ նախկին վարչապետ Արայիկ Հարությունյանը, արցախյան շարժման ակտիվիստ Ռազմիկ Պետրոսյանը։

Իսկ ինքն ասելու բան չունի, քանի որ ներկա չի եղել Արցախում Ս․Սարգսյանի այդ հանդիպմանը։ Ինչ վերաբերում է հարցին, թե ի վերջո Ս․Սարգսյանը վկայի կարգավիճակով հարցաքննվե՞լ է, Շարմազանովը պատասխանեց, որ տեղյակ չէ, և այդ հարցով պետք է դիմել ՀՔԾ-ին։

Նշենք, որ ՀՔԾ-ից Սերժ Սարգսյանի հարցաքննության մասին տեղեկությունը չեն հերքում, բայց և՝ չեն մեկնաբանում։

Արմինե Ավետյան