29.06.2026 | 13:37
Ինչո՞ւ եք 4 օր անց արձագանքել ժամը 20-ից հետո ընթացող քվեարկություններին․ ՍԴ դատավորը՝ ԿԸՀ նախագահին․ ՏԵՍԱՆՅՈՒԹ
Դատարանը հրապարակեց Վահագն Հարությունյանի խափանման միջոցի գործով որոշումը
Հասարակություն
06.02.2019 | 16:24
Վերաքննիչ քրեական դատարանն այսօր՝ փետրվարի 6-ին, հրապարակեց «Մարտի 1-ի» գործով քննչական խմբի նախկին ղեկավար Վահագն Հարությունյանի խափանման միջոցի գործով որոշումը։
Factor.am-ի հետ զրույցում Հարությունյանի պաշտպան Միհրան Պողոսյանն ասաց, որ դատարանը մասնակի բավարարել է պաշտպանական կողմի բողոքը, բեկանել կալանավորման որոշումը և գործն ուղարկել Առաջին ատյանի դատարան՝ նոր քննության։
«Կարծում եմ, որ դատարանը շեշտը դրել է պաշտպանական իրավունքից զրկելու վերաբերյալ խախտումներին, որի մասին պաշտպանական կողմը բարձրաձայնում էր»,- ասաց պաշտպանը։
Միհրան Պողոսյանը նաև հավելեց, որ պաշտպանական կողմը բողոքարկել է նաև Վահագն Հարությունյանի նկատմամբ հետախուզում հայտարարելու որոշումը։
«Բողոքը մակագրվել է դատավոր Արտուշ Գաբրիելյանին, որը դեկտեմբերի 25-ից մինչ այսօր որևէ դատական նիստ չի հրավիրել»,- ասաց պաշտպանը։
Հիշեցնենք, որ «Մարտի 1-ի» գործով ապացույցներ կեղծելը կազմակերպելու համար մեղադրվող Վահագն Հարությունյանին առաջադրված մեղադրանքը լրացվել է 2018թ. դեկտեմբերին։
Նա, որպես մեղադրյալ է ներգրավվել ՀՀ ՔՕ 308-րդ հոդվածի 2-րդ մասով (պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ) և 309-րդ հոդվածի 2-րդ մասով (պաշտոնեական լիազորություններն անցնելը, որը զուգորդվել է բռնություն, զենք կամ հատուկ միջոցներ գործադրելով):
Աղավնի Սուքիասյան
