06.06.2026 | 12:25
Էլինա Ավանեսյանը կիսաեզրափակիչ է դուրս եկել Խորվաթիայում
7 մլրդ դրամի ներդրում, 75 հազ. դրամ աշխատավարձո՞վ․ Փաշինյանը՝ ականջ ծակող ծրագրի մասին. ՏԵՍԱՆՅՈՒԹ
Տնտեսություն
06.02.2019 | 12:09
Կառավարության փետրվարի 6-ի նիստում գործադիրը հարկային արտոնություն տրամադրեց «Լիկվոր» փակ բաժնետիրական ընկերությանը, որը զբաղվում է դեղամիջոցների արտադրությամբ։
Ըստ որոշման նախագծի՝«ԼԻԿՎՈՐ» ընկերությունը կօգտվի գերակա ոլորտում իրականացվող ներդրումային ծրագրի շրջանակներում ներմուծվող տեխնոլոգիական սարքավորումները, դրանց բաղկացուցիչ ու համալրող մասերը, հումքը և նյութերը ներմուծման մաքսատուրքից ազատելու արտոնությունից։
Հարցի զեկուցող Տնտեսական զարգացման և ներդրումների նախարար Տիգրան Խաչատրյանը նշեց, որ «Լիկվոր» ՓԲԸ-ն հանդիսանում է ստերիլ դեղամիջոցներ արտադրող ընկերություն, գործում է քիմիական արդյունաբերության բնագավառում, որն արդյունաբերության ենթաոլորտ է, իսկ ներմուծվող ապրանքներն օգտագործվելու են ստերիլ դեղամիջոցների, ակնակաթիլների արտադրության մեջ։
Ըստ նախարարի՝ նախատեսվում է ծրագրի շրջանակում իրականացնել 7,6 մլրդ դրամի ներդրում, որն ուղղված է լինելու հումքի, նյութերի, օժանդակ նյութերի, տեխնոլոգիական սարքավորումների և դրանց բաղկացուցիչ մասերի ներմուծմանը:
Նախատեսվում է ներդրումային ծրագրի շրջանակում ստեղծել 8 նոր աշխատատեղ՝ 75 500 ՀՀ դրամ միջին աշխատավարձով։
Վարչապետ Նիկոլ Փաշինյանը հետաքրքրվեց՝ արդյո՞ք անհամապատասխանություն չկա 7 մլրդ դոլարի ներդրման և 75 հազար դրամ միջին աշխատավարձի մեջ։
«Ականջ ծակեց 7 մլրդ դրամի ներդրումը, 75 հազ. դրամ աշխատավարձով, 8 աշխատատեղը․ այստեղ դիսոնանս չկա՞»,-հարցադրում արեց վարչապետը, ինչին ի պատասխան նախարար Խաչատրյանը նշեց, որ արտոնությունը վերաբերում է ընկերության ամբողջական գործունեությանը, և, հետևաբար, այդ ամբողջական գործունեության արդյունքում ավելանալու են նոր աշխատատեղեր։
Մանրամասները՝ տեսանյութում։
Աղավնի Սուքիասյան
