29.06.2026 | 13:37
Ինչո՞ւ եք 4 օր անց արձագանքել ժամը 20-ից հետո ընթացող քվեարկություններին․ ՍԴ դատավորը՝ ԿԸՀ նախագահին․ ՏԵՍԱՆՅՈՒԹ
Ինչո՞ւ են 10 միլիոնով տուգանելու «Վեոլիա Ջուր»- ՓԲԸ-ին. մեկնաբանում են ընկերությունից
05.02.2019 | 18:35
Հանրային ծառայությունները կարգավորող հանձնաժողովը վաղը՝ փետրվարի 6-ին կքննարկի «Վեոլիա Ջուր» ընկերությանը 10 միլիոն դրամով տուգանելու հարցը: Պատճառը Factor.am-ը փորձեց ճշտել ընկերության մամուլի խոսնակ Մուրադ Սարգսյանից: Վերջինն ասաց՝ մի բան է, երբ տուգանվում ես անգործության համար, մեկ այլ բան, որ տուգանվում ես, երբ աշխատանքի ավարտն արդեն մոտ է լինում:
««Վեոլիա Ջուր»-ը, ստանձնելով Հայաստանի ջրամատակարարման համակարգերի կառավարումը, ստանձնել է նաև մեծ պարտավորություն՝ անհատական ջրագծերի կառուցում մեր բնակիչների համար: Հայաստանում նման բան չի եղել, սա նոր մշակույթ է: Այսինքն՝ նախկինում ամեն մարդ ինքն է կառուցել ջրագծերը՝ ինչպես կարողացել է, սեփական ուժերով։ Հիմա արդեն, Հայաստանի գործող օրենսդրությամբ, առանց ծրագրի, առանց շինարարական կազմակերպության տեխնիկական վերահսկողության դա արգելվում է: Այդ գործը մենք պետք է անենք՝ վարձելով համապատասխան կազմակերպություններ, կամ նույն բաժանորդը, բայց կրկին կազմակերպություններ միջոցով»,- պարզաբանեց Մուրադ Սարգսյանը:
Պարզվում է՝ տուգանքի պատճառն աշխատանքը սահմանված ժամկետում չկատարելն է։ Սարգսյանի մեկնաբանմամբ՝ ջրագծերի կառուցման հստակ ժամկետ կա սահմանված, որը խախտելու պարագայում ընկերությունը տուգանվում է, բայց ամեն ինչ այնքան խիստ է դրված, որ տուգանքը կիրառելիս հաշվի չի առնվում, թե ինչն է եղել պատճառը, որ ջրագծի կառուցումը ժամանակին չի կատարվել:
«Հաշվի առնելով Հայաստանի տարածքով մեր համակարգի ցրվածությունը՝ շինարարական կազմակերպություններ գտնելու ժամկետները, տարածքային, տեղական ինքնակառավարման մարմինների հետ տեխնիկական հարցերըն փաստաթղթերը համաձայնեցնելու գործընթացները ժամանակ են պահանջում, և միշտ չէ, որ կարողանում ենք սահմանված ժամկետներում գործել: Սրանց գումարվում են նաև եղանակային պայմանները»,- հավելեց Մուրադ Սարգսյանը:
«Վեոլիա Ջուր»-ի խոսնակն ասաց՝ պետք է նկատել նաև առաջընթացը, որ կազմակերպությունը գրանցել է. «Պայմանականորեն ասած, եթե 2017 թվականի առաջին կիսամյակում 100 դիմումից 50-ը չէինք կարողանում ժամկետի մեջ իրականացնել, հիմա արդեն կա առաջընթաց՝ 100-ից ընդամենը 10-ի դեպքում չենք տեղավորվում ժամկետի մեջ: Այսինքն՝ տուգանելուն զուգահեռ՝ նաև պիտի դիտարկեն առաջընթացը»:
Նա վստահեցրեց, որ ամեն ինչ կանեն, որպեսզի առաջիկայում նման խնդիրների այլևս չբախվեն:
Լիլիթ Շաբոյան
