Առաջնայինը ոչ թե լարվածության նվազեցմանն ուղղված փաթեթի անվանումն է, այլ դրա իրագործումը. ՏԵՍԱՆՅՈՒԹ

ԼՂ հակամարտության կարգավորման գործընթացում Հայաստանի համար առաջնայինը ոչ թե լարվածության նվազեցմանն ուղղված փաթեթի անվանումն է, այլ դրա իրագործումը: Փետրվարի 5-ին տեղի ունեցած ճեպազրույցում այս մասին ասաց ՀՀ ԱԳՆ խոսնակ Աննա Նաղդալյանը՝ պատասխանելով հարցին՝ արդյո՞ք Վիեննայի և Սանկտ Պետերբուրգի համաձայնությունները մի կողմ են թողնվել, իսկ հետաքննության մեխանիզմների ներդրման հարցը հայտնվել է լուսանցքում:

«Մենք դա ավելի լայն իմաստով ենք դիտարկում. ռիսկերի նվազեցմանն ուղղված գործողություններ՝ այն իմաստով, որ մեզ համար ավելի կարևոր է, թե ինչն է աշխատում, ինչը չի աշխատում՝ անկախ նրանից, թե այն ինչ կկոչեք՝ Վիեննա, Սանկտ Պետերբուրգ, թե՞ Դուշանբե: Մեզ համար կարևորը դրանց աշխատունակությունն է և իրական արդյունքը, ոչ թե հրապարակային կողմը կամ անվանումը»,- հավելեց նա:

Ըստ Աննա Նաղդալյանի՝ Հայաստանը չի հրաժարվել և չի կարող հրաժարվել որևէ գործառույթի իրականացումից, որը նպաստում է ռիսկերի նվազեցմանը և լարվածության բացառմանը՝ անկախ նրանից, թե այդ փաթեթն ինչ անվանում կունենա:

Ինչ վերաբերում է ժողովուրդներին խաղաղությանը նախապատրաստելուն, ըստ ԱԳՆ խոսնակի՝ սա վերջին շրջանում ամենաշահարկված դրույթն է:

«Այս դրույթը խաղաղության գործընթացում, եթե լավ եմ հիշում՝ 2006 թվականից ամրագրված է ԵԱՀԿ Մինսկի խմբի հայտարարություններում: Այդ դրույթի մասին բազմիցս հայտարարել է նաև հայկական կողմը՝ նշելով, որ ժողովուրդներին պետք է պատրաստել խաղաղության, այլ ոչ թե պատերազմի: Փարիզում կայացած հանդիպումից հետո մասնակիցների կողմից արված հայտարարություններում նույնպես ամրագրվեց այդ դրույթը, և սա երևի թե այն եզակի, եթե ոչ միակ դեպքն է, որ դա ամրագրվում է բոլորի կողմից»,- ասաց Աննա Նաղդալյանը՝ հավելելով, թե զարմանալի է, որ նման ալիք տարածվեց հասարակության շրջանում առ այն, որ դրա հասցեատերը հայկական կողմն է:

Մանրամասները՝ տեսանյութում