Փետրվարի լույս 5-ի գիշերը ժամը 5:20-ի սահմաններում Կապանում հրկիզվել է «Սյունյաց երկիր» թերթի խմբագրության մեքենան: Factor.am-ի հետ զրույցում խմբագիր Սամվել Ալեքսանյանը նշեց, որ սա առաջին դեպքը չէ, երբ թերթին լռեցնելու համար նման քայլերի են դիմում:
«Ես սա համարում եմ նախորդ բոլոր դեպքերի շարունակությունը, կոնկրետ մարդու անուն տալու համար ես առնվազն պետք է ականատես եղած լինեի դեպքին: Ենթադրություններ, սակայն, շատ ունեմ»,- ասաց նա:
Խմբագիրը պատմեց, որ ձևավորվել է մի մթնոլորտ, որտեղ հերթական հարձակումն է իրականացվել իրենց խմբագրության դեմ. «Կարծում եմ՝ սա վրեժխնդրություն է, որը պայմանավորված է բացառապես թերթի մասնագիտական գործունեությամբ»:
Նա նշեց նաև, որ հրկիզված մեքենան պիտանի չէ օգտագործման, սակայն առանժմ չգիտեն, թե որքան նյութական վնաս է պատճառվել, սպասում են ոստիկանության պատասխանին:
Սամվել Ալեքսանյանն ակնկալում է, որ այս դեպքը մնացած հարձակումների պես չի պարտակվի, այլ կբացահայտվի, և թերթի դեմ ոտնձգություն կատարած անձը պատասխանատվության կենթարկվի:
Խմբագրությունն այս դեպքի առնչությամբ հայտարարություն էր տարածել՝ նշելով, որ դեպքը կկանխվեր, եթե թերթի դեմ մնացած ոտնձգությունններն անհետևանք չմնային:
««Սյունյաց երկիրը» վերջին 2-3 տարում բազմաթիվ անգամ անդրադարձել է Սյունիքի նախկին մարզպետ Վահե Հակոբյանի սյունիքյան վնասարարությանը, ինչպես նաև «Զանգեզուրի ՊՄԿ» ՓԲԸ-ի գործունեությանը: Թերթը, ընդառաջ գնալով հազարավոր սյունեցիների ցանկություններին, մասնավորապես պահանջել է բացահայտել Քաջարանի կոմբինատի սեփականատերերին և զսպել Սյունիք ներխուժած հրոսակների ախորժակը: Միայն այսօր Քաջարանի կոմբինատի ղեկավարները քաղաքացիական 13 հայց ունեն՝ ընդդեմ Սամվել Ալեքսանյանի և թերթի հիմնադիր «Սյունյաց աշխարհ» ՍՊԸ-ի: Ընդ որում՝ Երևան քաղաքի ընդհանուր իրավասության դատարանն անթաքույց լծվել է Քաջարանի կոմբինատի ծպտված սեփականատերերի պաշտպանությանը: Հայցերից մեկի ապահովման նպատակով նույնիսկ Սյունիքում դադարեցվել է ՀՀ սահմանադրության 42-րդ հոդվածի գործունեությունը, ավելի կոնկրետ՝ «Սյունյաց երկիր» թերթին ու կայքին արգելվել է որևէ կարծիք հայտնել կոմբինատի սոցիալական դեպարտամենտի ղեկավար Զարուհի Տոնապետյանի մասին: Նույն դատարանի որոշմամբ՝ 11 մլն դրամի չափով արգելանք է դրվել թերթի խմբագրի անձնական ունեցվածքի վրա»,- ասված է հայտարարության մեջ:
Լիլիթ Շաբոյան
