Վարդենիսում համայնքապետի ընտրություններից առաջ կրքերը լարվել են․ ընտրակաշառքի մեղադրանքն ու մարզպետի գործոնը

Վարդենիս քաղաքում համայնքի ղեկավարի ընտրությանն ընդառաջ նախընտրական կրքերը թեժացել են։ Factor.am-ի հետ զրույցում Վարդենիս համայնքի ղեկավարի թեկնածու Կարեն Մկրտչյանը նշեց, այսօր առավոտյան Վարդենիս համայնքի ղեկավար Արամ Մելքոնյանը, խախտելով «Տեղական ինքնակառավարման մարմինների մասին» ՀՀ օրենքը, հավաքել է համայնքի ավագանուն և աշխատակազմին ու հայտնել, թե ինքը կարգ է խախտել և ընտրակաշառք բաժանել։

«Ուզում եմ տեղեկացնել, որ ես, երբ 2017-ի նոյեմբերի 13-ին նշանակվել եմ Վարդենիսի փոխքաղաքապետ, արդեն 1 տարի 2 ամիս է` համագործակցում ենք «Կամրջակ» սոցիալ-բարեգործական կազմակերպության հետ։ Բարերարի միջոցներով համայնքի սոցիալապես անապահով ընտանիքներին ձմռան ցուրտ ամիսներին բաժանվում են օգնության տոպրակներ` սննդի և կենցաղային անհրաժեշտությունների տեսքով. 200-ից ավել ընտանիք արդեն ստացել է այդ օգնությունը, մոտ 300 ընտանիք հերթագրված է։ Վերանորոգվել են 3 բազմաբնակարան շենքերի տանիքներ, որոնք կառուցման օրից երբեք չէր նորոգվել, մոտ 200 ընտանիքի կարտոֆիլի սերմացու, պարարտանյութ է բաժանվել: Ու երբ ես սկսեցի իմ համագործակցությունը բարերարի հետ, չէի պատկերացնում, որ երկու տարի չանցած՝ Վարդենիսում նոր ընտրություններ են լինելու, որ ընտրակաշառք բաժանեմ. այդ տոպրակները բաժանվել են ու կբաժանվեն։ Տեղեկացնեմ նաև, որ նույն բարերարի միջոցներով 120 միլիոն դրամից ավել ներդրում է կատարվել Վարդենիսում»,- ներկայացրեց Մկրտչյանը՝ նշելով, որ թեև հստակ չի կարող ասել, որ սա իր դեմ ուղղորդված արշավ է, սակայն վստահեցնում է՝ մասնակցելու է 2019 թվականի փետրվարի 17-ին կայանալիք ընտրություններին և տեր է կանգնելու իրեն տրված յուրաքանչյուր քվեի։

Կարեն Մկրտչյանի խոսքով՝ ինքը կուսակցական պատկանելություն չունի, նա շեշտեց՝ անկուսակցական է նաև Վարդենիսի քաղաքապետի գործող Ժ/Պ Արամ Մելքոնյանը։ «ԿԸՀ ներկայացված գործերից նման պատկեր է, որ անկուսակցական է»,- ասաց Մկրտչյանը։

Հարցին՝ իսկ ի՞նչ հարաբերությունների մեջ է Արամ Մելքոնյանը Գեղարքունիքի մարզպետ Գնել Սանոսյանի հետ, պատասխանեց․ «Արամ Մելքոնյանը մարզպետ Գնել Սանոսյանի ընկերն է, որի մասին անձամբ մարզպետն է ասել»։

Թե ինչո՞ւ են նախընտրական կրքերը լարվել Վարդենիս համայնքում, Factor.am-ը փորձեց պարզել նաև քաղաքապետի գործող Ժ/Պ Արամ Մելքոնյանից։ Մեր հարցերին Մելքոնյանը հրաժարվեց պատասխանել՝ նշելով, որ դրանք անպատասխան չի թողնի բացառապես գրավոր հարցում ուղարկելու պարագայում։

Դիտարկմանը, որ իր հասցեին հնչում են քննադատություններ, որ թմբկահարում է իր և Գեղարքունիքի մարզպետ Գնել Սանոսյանի մտերմությունն ու ընկերական հարաբերությունները, Մելքոնյանը պատասխանեց․ «Ես ունեմ բազմաթիվ ընկերներ, տարածքային կառավարման մարմիններում, իսկ ինչ վերաբերում է իմ և Գնել Սանոսյանի ընկերությունն անընդհատ շրջանառելուն, ապա ես նման բան չեմ անում»։

Արամ Մելքոնյանից հետաքրքրվեցինք նաև նրա կուսակցական պատկանելության մասին, ինչին ի պատասխան նշեց, որ անկուսակցական է։ Դիտարկմանը՝ այդ դեպքում ինչո՞ւ է Գեղարքունիքի մարզպետարանի կայքում իր անվան դիմաց նշված ՀՀԿ, Մելքոնյանը պատասխանեց․ «Դա չգիտենք՝ ում ձեռքի գործն է, փորձում ենք հասկանալ և ուղղել։ Կրկնում եմ՝ ես կուսակցական չեմ»:

Աղավնի Սուքիասյան