09.06.2026 | 00:17
Մարկո Ռուբիոն շնորհավորել է Փաշինյանին
Սերժ Սարգսյանի՝ Մարտի 1-ի գործով ՀՔԾ-ում հարցաքննվելու մասին Հանրապետականները տեղյակ չեն
Քաղաքականություն
04.02.2019 | 15:18
Հատուկ քննչական ծառայությունում Հանրապետական կուսակցության առաջնորդ Սերժ Սարգսյանի հարցաքննվելու վերաբերյալ ՀՀԿ-ական Վարհրամ Բաղդասարյանը տեղեկացել է մամուլից:
«Մամուլից եմ իմացել, որ հարցաքննվել է և վկայի կարգավիճակով, այլ բան չգիտեմ»,- Factor.am-ի հետ զրույցում ասաց ՀՀԿ-ական նախկին պատգամավորը։
Մենք կապ հաստատեցինք նաև ՀՀԿ փոխնախագահ Արմեն Աշոտյանի հետ, որը, սակայն, ընդամենը փոխանցեց․ «Ես գործուղման եմ, դրսում եմ և ինձ հիմա հարմար չէ խոսելը»։
ՀՀԿ նախագահ Սերժ Սարգսյանի հարցաքննության մասին որևէ տեղեկություն չհաջողվեց պարզել նաև ՀՀԿ կազմակերպչական հանձնաժողովի նախագահ Ռուբեն Թադևոսյանից․ «Որևէ տեղեկություն չունեմ այդ մասին»։
Նշենք որ այս հարցի շուրջ մեզ չհաջողվեց մեկնաբանություն ստանալ ՀՀԿ խոսնակ էդուարդ Շարմազանովից․ նրա հեռախոսահամարներն անհասանելի են, իսկ ՀՔԾ-ից տեղեկությունը հաստատելու մեր խնդրանքին ի պատասխան՝ պարզապես ասացին․ «չենք մեկնաբանում»։
Հիշեցնենք, որ Սերժ Սարգսյանի՝ «Մարտի 1-ի» գործով ՀՔԾ-ում հարցաքննվելու վերաբերյալ գրել է armtimes.com կայքը։ Ըստ կայքի տեղեկությունների՝ Սերժ Սարգսյանը փետրվարի 1-ին 5 ժամ Հատուկ քննչական ծառայությունում է եղել։
Աղավնի Սուքիասյան
