ՊԵԿ-ն էլ պիտի դառնա խորհրդարանին հաշվետու մարմին. Էդմոն Մարուքյան. ՏԵՍԱՆՅՈՒԹ

Վարչապետն ու կառավարությունը, երևի, մտածում են, որ ԱԱԾ-ն ու ոստիկանությունը վարչապետի վերահսկողությունից հանելով՝ իշխանություն են կիսում ինչ-որ մեկի հետ: Factor.am-ի հետ զրույցում նման կարծիք հայտնեց ՀՀ Ազգային ժողովի «Լուսավոր Հայաստան» խմբակցության ղեկավար Էդմոն Մարուքյանը՝ հավելելով, սակայն, որ նման բան չկա:

«Խորհրդարանական վերահսկողությունը չի նշանակում իշխանությունը կիսել: Նշանակում է՝ հաշվետվողականության մասով խորհրդարանի պատասխանատվություն, բայց իշխանության կիսում չի նշանակում, որովհետև այդ մարմինների կայացրած որոշումների համար կրկին պատասխանատու է կառավարությունը՝ իր ղեկավարով: Խորհրդարանն ընդամենն ունենալու է վերահսկողական ֆունկցիաներ»,- ասաց նա:

Մարուքյանը հիշեցրեց, որ իշխանությունը խոստացել է ԱԱԾ-ն և ոստիկանությունը հանել վարչապետի վերահսկողությունից, և պետք է կատարի խոստումը. «Ես կարծում եմ՝ իշխանությունները պետք է հոդաբաշխ, ողջամիտ պատճառաբանություն ներկայացնեն, թե ինչու այս տրված խոստումն այսօր չեն ցանկանում կատարել: Որովհետև եթե մի խոստում չես կատարում, մնացած բոլոր խոստումները դրվում են կասկածի տակ: Սա շատ կարևոր հանգամանք է: Միշտ ասվում է՝ մենք ինչ ասել ենք, արել ենք: Հիմա սա կոկրետ խոստում է, որը տրվել է»:

Էդմոն Մարուքյանը կարծում է, որ Պետեկամուտների կոմիտեն նույնպես պետք է հաշվետու լինի խորհրդարանին. «ՊԵԿ-ն անվտանգության սեկտորի հետ կապ չունի, բայց, տեսեք, մենք բյուջե ենք հաստատում, բյուջե ենք հավաքում, բայց հարկահավաք մարմինը հաշվետու չէ խորհրդարանին»:

«Լուսավոր Հայաստան» կուսակցության ղեկավարն առաջիկայում պատրաստվում է ևս մեկ խնդրի մասին խոսել՝ կառավարության կազմը 2/3-ով հաստատելու: «Հիմա չեմ ուզում խոսել այդ մասին, որովհետև մենք դեռ ուսումնասիրում ենք: Իրենք ասել են՝ 2/3-ը նշանակվում է, ուրեմն նորմալ է, կարող ենք այսպես աշխատել: Բայց Սահմանադրությունն այլ բան է ասում, որի մասին կխոսենք»,- հավելեց Էդմոն Մարուքյանը:

Մանրամասները՝ տեսանյութում