14.12.2024 | 19:57
Ինչ իրավիճակ է ճանապարհներին 19։35-ի դրությամբ
Շատ կարևոր է, որ ԵՄ-ի գործընկերները մեր առաջ աշխարհաքաղաքական ընտրության խնդիր չեն դնում. Փաշինյան
Քաղաքականություն
01.02.2019 | 16:57
Կարևոր է, որ Եվրամիության մեր գործընկերները մեր առաջ չեն դրել և չեն դնում աշխարհաքաղաքական ընտրության խնդիր: Պաշտոնական այցով Բեռլինում գտնվող ՀՀ վարչապետ Նիկոլ Փաշինյանն այս մասին ասել է Գերմանիայի կանցլեր Անգելա Մերկելի հետ համատեղ մամուլի ասուլիսի ընթացքում:
Ամիսներ առաջ Գերմանիայի կանցլերը պաշտոնական այցով Հայաստանում էր, հիշեցրել է Նիկոլ Փաշինյանը՝ Մերկելին շնորհակալություն հայտնելով պատասխան պաշտոնական այցի հրավերի համար:
«Ուրախ եմ, որ այս ընթացքում կարևոր զարգացումներ են արձանագրվել Հայաստանում, ինչը ևս մեկ անգամ ցույց է տվել, որ ժողովրդավարությունը և ժողովրդավարական համակարգն անշրջելի են Հայաստանի համար: Ուրախ ենք, որ և՛ Գերմանիան, և՛ Եվրամիությունն ընդհանրապես պատրաստակամ են՝ Հայաստանին աջակցել ժողովրդավարական բարեփոխումների գործընթացում: Եվ շատ կարևոր է ընդգծել, ո Եվրամիության մեր գործընկերները և Գերմանիան՝ առավել ևս, այս բարեփոխումների համատեքստում մեր առաջ չեն դնում և չեն դրել աշխարհաքաղաքական ընտրության խնդիր: Սա նշանակում է, որ մեր բարեփոխումների օրակարգն իսկապես կարող է լիարժեք իրագործվել նաև Եվրամիության և հատկապես Գերմանիայի աջակցությամբ»,- ասել է ՀՀ վարչապետը:
Ըստ Փաշինյանի՝ Գերմանիան Հայաստանի կարևոր միջազգային գործընկերն է, ԵՄ երկրներից Հայաստանի թիվ մեկ առևտրատնտեսական գործընկերը, իսկ աշխարհում՝ երկրորդը. «Այս փաստով արդեն արձանագրվում է այն առանձնահատուկ կարևորությունը, որ ունեն Հայաստանի և Գերմանիայի հարաբերությունները: Կարող ենք արձանագրել, որ մեր հարաբերությունները բավականին լավ, դինամիկ զարգացում են ստանում»:
