15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
Եթե ԱԱԾ ղեկավարը լինի քաղաքական գործիչ, ծառայությունը քաղաքականացվելու է. Արթուր Վանեցյան
Քաղաքականություն
01.02.2019 | 15:05
Եթե լինի քաղաքական որոշում, որ Ազգային անվտանգության ծառայությունը պետք է դառնա նախարարություն, իհարկե, ես պարտավոր եմ ենթարկվել այդ որոշմանը, սակայն ուզում եմ ասել, որ նախարարը քաղաքական պաշտոն է, և եթե ԱԱԾ ղեկավարը լինի քաղաքական գործիչ, ուզի թե չուզի, փորձելու է առաջ տանել իր քաղաքական ուժին, այսինքն՝ ԱԱԾ-ն քաղաքականացվելու է։
Փետրվարի 1-ին «Հայրենիքի պաշտպան» վերականգնողական կենտրոնում շրջայցից հետո լրագրողների հետ զրույցում այս մասին ասել է ԱԱԾ տնօրենը՝ անդրադառնալով կառավարության կառուցվածքի փոփոխության մասին հարցին։
Դիտարկմանը, թե բանակը, փաստորեն, քաղաքակա՞ն կառույց է, Արթուր Վանեցյանը պատասխանել է, որ բանակն ունի նախարար, սակայն ունի նաև Գլխավոր շտաբի պետ, որը կապ չունի քաղաքականության հետ. «Զորքի անմիջական ղեկավարումն իրականացնում է շտաբի պետը, իսկ Պաշտպանության նախարարությունն իրականացնում է օրենքով վերապահված իր լիազորությունները, որոնք վերաբերում են նաև բանակի քաղաքականությանն ու այլ հարցերի․ կա հստակ տարանջատում»:
Անդրադառնալով ԱԱԾ-ի հաշվետվողականության խնդրին՝ նա նշեց, որ իրենց ուղղված բոլոր հարցերը ստանում են պատասխաններ։
«Այն արատավոր պրակտիկան, երբ ԱԱԾ-ն չէր պատասխանում հարցումներին, վերացված է: Չկա մեկ դեպք, որն այս վերջին ամիսներին մատնանշեն և ասեն, որ չենք պատասխանել որևէ հարցի, իհարկե, եթե այդ հարցը չի պարունակում պետական գաղտնիք»,- նկատել է Վանեցյանը։
Աղավնի Սուքիասյան
