19.12.2025 | 23:07
Պետությունը շարունակելու է աշխատանքներ իրականացնել սոցբնակարանային ֆոնդի ընդլայնման ուղղությամբ. ԱՍՀ նախարար
Այն զինվորները, որոնք վիրավորում են ստացել ծառայության ընթացքում, կարող են աշխատանքի անցնել ԱԱԾ-ում և ՀՖՖ-ում. Արթուր Վանեցյան
Քաղաքականություն
01.02.2019 | 14:22
Ազգային անվտանգության ծառայության տնօրեն, Ֆուտբոլի ֆեդերացիայի նախագահ Արթուր Վանեցյանն այսօր այցելել է «Հայրենիքի պաշտպան» վերականգնողական կենտրոն։ Կենտրոնում շրջայց կատարելուց հետո լրագրողների հետ զրույցում նա նշել է, որ տպավորված է, ողջունում է, որ Հայաստանում կա նմանօրինակ հաստատություն, կան նվիրյալներ, որոնք օր ու գիշեր աշխատում են այս կենտրոնում։
Անդրադառնալով հարցին՝ արդյո՞ք ԱԱԾ-ի կողմից իրականացված միջոցառումների արդյունքում վերադարձված գումարներից կհատկացնեն այս կենտրոնին, ԱԱԾ տնօրենը նշել է, որ հետ բերված գումարներն ամբողջությամբ ուղղվելու են պետբյուջե:
«Համապատասխան գերատեսչությունները որոշում կկայացնեն՝ տրամադրել այս կամ այն ծախսի համար, եթե կարիքը լինի՝ նաև այս հաստատության վերազինման և արդիականացման համար»,- ասել է Արթուր Վանեցյանը:
Նա նաև նշել է, որ մեծ սիրով պատրաստ է ԱԱԾ-ում և Ֆուտբոլի ֆեդերացիայում աշխատանքի ընդունել այս կենտրոնում բուժվող տղաներին։
«Կարծում եմ՝ այդ համագործակցությունը մեզ մոտ կստացվի։ Այն զինվորները, սպաները, որոնք վիրավորում են ստացել ծառայության ընթացքում, կարող են աշխատանքը շարունակել ԱԱԾ-ում: Խոստանում եմ առաջիկայում և մշտապես այդ գործընթացը պահել հսկողության տակ՝ հնարավորինս շատ տղաների ներգրավելով Ֆուտբոլի ֆեդերացիայում և ԱԱԾ-ում աշխատանքի մեջ»,- ասել է Վանեցյանը։
Աղավնի Սուքիասյան
