Վաղարշակ Ավետիսյանին Արտակ Զեյնալյանը կհանդիպի հերթական այցի ընթացքում

2008թ. մարտի 16-ին Գորիսի ավտոճանապարհին տաքսու վարորդի սպանության համար ցմահ ազատազրկման է դատապարտված Վաղարշակ Ավետիսյանը անժամկետ հացադուլ է հայտարարել և խնդրում է հանդիպում Արդարադատութնա նախարար Արտակ Զեյնալյանի հետ։

Արդյոք նախարարը պատրաստվում է այցելել անժամկետ հացադուլ հայտարարած անձին՝ Factor.am-ը փորձեց պարզել Արդարադատության նախարարությունից։

Մեզ հետ զրույցում Արդարադատության նախարարի աշխատակազմի տեղեկատվության և հասարակայնության հետ կապերի վարչության պետ Լուսինե Մարտիրոսյանը նշեց, որ,  ՀՀ արդարադատության նախարար Արտակ Զեյնալյանը 2018 թվականի օգոստոսին «Արմավիր» քրեակատարողական հիմնարկ կատարած այցի ընթացքում հանդիպել է այդ ժամանակ ևս հացադուլի մեջ գտնվող ցմահ դատապարտյալ Վաղարշակ Ավետիսյանին, որը կրկին պահանջում էր վերանայել իր վերաբերյալ քրեական գործը:

«Նախարարը ցմահ դատապարտյալի հետ զրույցում ներկայացրել է Նախարարության իրավասությունները և տեղեկացրել, որ հարցի լուծումն Արդարադատության նախարարության տիրույթում չէ և չունի քրեական գործի վերաբացում նախաձեռնելու հնարավորություն: Արդարադատության նախարարությունը հորդորում է դատապարտյալ Վաղարշակ Ավետիսյանին դադարեցնել հացադուլը, գործի վերանայման համար օգտվել բացառապես օրենքով սահմանված ընթացակարգերից, միաժամանակ տեղեկացնում է, որ «Արմավիր» քրեակատարողական հերթական այցի ընթացքում, ինչպես բոլոր այլ դեպքերում, նախարար Զեյնալյանը կհանդիպի իր հետ հանդիպման ցանկություն ունեցող բոլոր դատապարտյալներին, այդ թվում նաև Ավետիսյանին»,-հայտնեց Մարտիրոսյանը:

Հիշեցնենք, որ Վաղարշակ Ավետիսյանը չի ընդունում իր մեղքը  և 2008 թվականից մինչ այսօր տարբեր ժամանակներում հացադուլ է հայտարարել՝ պահանջելով վերանայել իր քրգործը։

Աղավնի Սուքիասյան