Կենդանաբանական այգու աշխատակիցները պահանջում են տնօրենի հրաժարականը

Երևանի կենդանաբանական այգու մի խումբ նախկին և ներկա աշխատակիցներ Երևանի քաղաքապետարանի դիմաց բողոքի ակցիա էին անցկացնում։ Նրանք պահանջում էին կենդանաբանական այգու տնօրեն Ռուբեն Խաչատրյանի հրաժարականը և առաջարկում կառավարման խորհուրդ ստեղծել, որից հետո  նոր ընտրություններ անցկացնել։

Նշենք, որ բողոքի նախորդ ակցիան  հունվարի 26-ին էր՝ Կենդանաբանական այգու մոտ։

Կենդանասերների նախաձեռնող խմբի համակարգող Արմեն Ումրշատյանի խոսքով՝  իրենք երեք հիմնական պահանջ ունեն.

.Կենդանասերներին ներգրավել Երևանի քաղաքապետարանի աշխատանքներում,

.դադարեցնել այգու տնօրենի լիազորությունները,

.բացահայտել վերջին շրջանում գրանցված խախտումները։

«Դեռևս 2018թ. օգոստոսի 31-ին դիմում ենք ներկայացրել վերահսկող ծառայություններին և իրավապահ մարմիններին, և այս պահի դրությամբ դեռևս որևէ քայլ չի արվում։ Եվ եթե Երևանի քաղաքապետարանի աշխատակազմի կողմից այս երևույթների դեմ արձագանք չտրվի, և կենդանասերները անտեսվեն, մենք ցույցերը կշարունակենք։ Մենք փաստում ենք, որ թավշյա հեղափոխության արդյունքում երևի ոչինչ չի փոխվել, նորից իրենց կաբինետներում նստած իրենց գործողություններն են կատարում, ժողովրդի ձայնը լսելի չէ»,- ընդգծեց  Արմեն Ումրշատյանը։

Տնօրենի թեկնածու, ըստ Արմեն Ումրշատյանի, չունեն։  Իսկ ներկայիս տնօրենի մասին խոսելիս, նշում են, որ մարդկային որակներով ագամ չի համապատասխանում իր պաշտոնին։

Ակցիայի մասնակիցներին քաղաքապետարանի ներկայացուցիչն ընդունեց։ Խոստացավ պահանջները քաղաքապետին ներկայացնել և համապատասխան լուծումների սպասել։

Հիշեցնենք, որ  կենդանաբանական այգու տնօրենի հրաժարականը պահանջող աշխատակիցների  բողոքները դեռ մեկ ամիս առաջ էին սկսել, երբ այգու մի քանի կենդանիների անկում էր գրանցվել։

Նելլի Մելքոնյան