03.09.2026 | 23:17
Հայտնի են Ֆրանսիայի դեսպանատան ընդունելությունից հետո գրանցված թունավորման հնարավոր պատճառները. ՍԱՏՄ-ն մանրամասնել է
Հերթը հասավ վարչապետին. ինչո՞ւ է Նիկոլ Փաշինյանը գալիս ԱԺ՝ «Իմ քայլի» հետ հանդիպման
Քաղաքականություն
01.02.2019 | 12:09
«Իմ քայլը» խմբակցությունը վաղը՝ փետրվարի 2-ին, աշխատանքային հանդիպում է ունենալու ՀՀ վարչապետի հետ: Հանդիպումը տեղի է ունենալու Ազգային ժողովում:
Factor.am-ին փոխանցված տեղեկությունը մեզ հետ զրույցում հաստատեց «Իմ քայլը» խմբակցության պատգամավոր, Նիկոլ Փաշինյանի նախկին խորհրդական Նիկոլայ Բաղդասարյանը:
Նիկոլայ Բաղդասարյանը հրաժարվեց ասել, թե հանդիպման ընթացքում ինչ է քննարկվելու: Սա վարչապետի և «Իմ քայլը» խմբակցության անդամների միջև երկրորդ հանդիպումն է՝ խորհրդարանում:
Նման հանդիպում մեկ անգամ էլ խորհրդարանում «Իմ քայլը» խմբակցության և վարչապետի միջև տեղի էր ունեցել հունվարի 10-ի երեկոյան՝ մանդատների հանձնման օրը:
Իշխանություններն այս անգամ զգուշացել են, և հանդիպումը Ազգային ժողովի նիստերի դահլիճում անցկացնելու փոխարեն, նախընտրել են Ազգային ժողովի 334 սենյակը, որտեղ կարող էին նաև անցած անգամ տեղավորվել: Այս փաստը նախորդ անգամ սուր քննադատվեց ընդդիմության կողմից: Մասնավորապես Էդմոն Մարուքյանը հայտարարեց, որ ԱԺ նիստերի դահլիճը նախատեսված է լիագումար նիստերի և խորհրդարանական լսումների համար, խմբակցությունները նիստեր չեն կարող անել:
Երեկ էլ տեղեկացրել էինք, որ «Իմ քայլը» պատրաստվում է հանդիպել ֆինանսների նախարարի և տեղակալների հետ՝ պարգևավճարների և այլ հարցերի քննարկման համար: Տեղեկությունը մեզ հետ զրույցում հաստատել էր «Իմ քայլը» խմբակցության ղեկավար Լիլիթ Մակունցը:
Հայկ Վարդանյան
