03.09.2026 | 23:17
Հայտնի են Ֆրանսիայի դեսպանատան ընդունելությունից հետո գրանցված թունավորման հնարավոր պատճառները. ՍԱՏՄ-ն մանրամասնել է
Ղարաբաղյան հակամարտության խաղաղ կարգավորումը Հայաստանի գլխավոր առաջնահերթությունն է. Ռուբեն Ռուբինյան
Քաղաքականություն
31.01.2019 | 19:00
ՀՀ ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանը հունվարի 31-ին ընդունել է ՀՀ-ում Ֆրանսիայի Հանրապետության արտակարգ եւ լիազոր դեսպան Ջոնաթան Լաքոտին եւ աշխարհաքաղաքական գիտությունների դոկտոր Ֆրեդերիկ Էնսելին:
Տարածված հաղորդագրության համաձայն՝ ողջունելով հյուրերին Ռուբեն Ռուբինյանը հույս է հայտնել, որ խորհրդարանական համագործակցությունը միջազգային փորձագիտական հանրույթի ներկայացուցիչների հետ կլինի ավելի պարբերական եւ արդյունավետ:
«Հանդիպման ընթացքում կողմերն անդրադարձել են տարածաշրջանային զարգացումներին եւ աշխարհաքաղաքական մի շարք իրադարձությունների:
Մասնավորապես, խոսելով ղարաբաղյան հակամարտության կարգավորման մասին՝ արտաքին հարաբերությունների մշտական հանձնաժողովի նախագահը նշել է, որ խաղաղ կարգավորումը Հայաստանի գլխավոր առաջնահերթությունն է: Նա կարեւորել է հակամարտության կարգավորումը խաղաղ բանակցային գործընթացի միջոցով՝ Արցախի ժողովրդի կամարտահայտման իրավունքի համատեքստում:
Ռուբեն Ռուբինյանը կարեւորել է բանակցային գործընթացում կառուցողական մթնոլորտի առկայությունը, անթույլատրելի համարել պետական մակարդակում ատելության խոսքի կիրառումը՝ որպես սպառնալիք հակամարտության խաղաղ կարգավորման կառուցողական գործընթացին:
Կողմերն անդրադարձել են նաեւ հետհեղափոխական շրջանում Հայաստանի որդեգրած բարեփոխումների քաղաքականությանը: Այս համատեքստում կարեւորվել է արդար ընտրությունների անցկացումը՝ որպես ժողովրդավարության ուղղությամբ ձեռնարկված կարեւոր քայլ: Ռուբեն Ռուբինյանը նշել է, որ Կառավարությունը վճռական է տնտեսական հեղափոխության, ժողովրդավարական, դատական բարեփոխումների իրականացման հարցում:
Անդրադարձ է կատարվել նաեւ Հայոց ցեղասպանության միջազգային ճանաչման խնդրին. կարեւորվել է միջազգային ասպարեզում Հայաստանի՝ ցեղասպանությունների կանխարգելման գործում կարեւոր դերակատարությունը:
Քննարկվել են նաեւ արտաքին հարաբերությունների մշտական հանձնաժողովի գործունեությանը վերաբերող հարցեր: Ռուբեն Ռուբինյանն այս առնչությամբ նշել է, որ հանձնաժողովը հանձնառու է լինել խորհրդարանական դիվանագիտության համակարգող օղակ:
Կողմերը կարեւորել են նաեւ Հայաստանի եւ Ֆրանսիայի խորհրդարանների միջեւ առավել սերտ հարաբերությունների խթանումը, ինչպես նաեւ համագործակցությունը միջազգային կառույցներում»,-ասված է հաղորդագրության մեջ:
