Սուպերվարչապետությունը ավտորիտար կառավարման համակարգ է, դրա հենքը պետք է կազմաքանդվի. Էդմոն Մարուքյան․ ՏԵՍԱՆՅՈՒԹ

ԱԺ «Լուսավոր Հայաստան» խմբակցության ղեկավար Էդմոն Մարուքյանը պնդում է՝ Ազգային անվտանգության ծառայությունը, ոստիկանությունն ու Պետական եկամուտների կոմիտեն պետք է դուրս գան վարչապետի վերահսկողությունից և անցնեն խորհրդարանական վերահսկողության դաշտ:

Factor.am-ի հետ զրույցում Մարուքյանն ասաց՝ այն պնդումները, որ այդ կառույցները կլինեն խորհրդարանական վերահսկողության ներքո, պատրանքային պնդումներ են:

«Որևէ մեկը չպետք է մեզ լավություն անի խորհրդարան գալով, և ասեն՝ վայ, տեսեք՝ ինչ լավ է ոստիկանապետը եկել է խորհրդարան, եկեք ծափահարենք, ուրախանանք, կարող եք իրեն հարց տալ և այլն: Դա աբսուրդ է, մենք ինստիտուցիոնալ ռեֆորմ ենք առաջարկում, ինչը ժամանակին նաև միասին ենք ասել, հիմա դարձել են իշխանություն և ասում են՝ դա պետք չէ»,- ասաց Մարուքյանը:

Պատգամավորը նաև համաձայն չէ այն փաստարկների հետ, որ վերը նշված կառույցները նախարարության կարգավիճակ ստանալու դեպքում, կքաղաքականացվեն. «Փորձը ցույց է տալիս, երբ որ այդ մարմինները ենթարկվում են կոնկրետ մեկ անձի, այդ պարագայում է, որ քաղաքականացվում են և օգտագործվում ներքաղաքական կյանքում»:

Բացի այդ, Մարուքյանը գտնում է, որ ՊԵԿ-ից և ԱԱԾ-ից պետք է դուրս բերվեն քննչական մարմինները, որովհետև կա շահերի բախում:

Էդմոն Մարուքյանը տեղեկացրեց, որ «Լուսավոր Հայաստան» խմբակցության փորձագետներն ուսումնասիրել են նաև միջազգային փորձը և պարզել, որ չկա խորհրդարանական երկիր, որտեղ կառավարության կառուցվածքից այդ մարմինները դուրս լինեն:

Մանրամասները՝ տեսանյութում:

Շողիկ Գալստյան