Վաղվանից սկսում ենք ուղեղի կաթվածի բուժման պետական ծրագիր՝ երկու ԲԿ-ում․ Արսեն Թորոսյան. ՏԵՍԱՆՅՈՒԹ

Գործադիրը սահմանեց առողջապահական պետական նպատակային ծրագրերի շրջանակում անվճար և արտոնյալ պայմաններով բնակչության սոցիալապես անապահով ու հատուկ խմբերի ցանկում ընդգրկված անձանց նորագույն և թանկարժեք տեխնոլոգիաներով մատուցվող բժշկական օգնության և սպասարկման ծառայություններից օգտվելու կարգը: Որոշման նախագիծն ընդունվեց ՀՀ կառավարության հունվարի 31-ի նիստում:

Առաջարկվող նախագծի համաձայն՝ պետպատվերի շրջանակում ավելի շատ բժշկական ծառայություններ կմատուցվեն և դրանցից կկարողանան օգտվել ավելի մեծ թվով շահառուներ:

Հարցը զեկուցող առողջապահության նախարար Արսեն Թորոսյանը նշեց, որ նոր բուժօգնության փաթեթից կօգտվեն ընտանեկան նպաստի համակարգում ընդգրկված 30.01 և ավելի բարձր անապահովության միավոր ունեցող նպաստառուները, Հայրենական մեծ պատերազմի մասնակիցներն ու նրանց հավասարեցված անձինք, ծերանոցներում և անօթևանների ժամանակավոր կացարաններում խնամվող անձինք, բռնադատվածները, Չեռնոբիլի ատոմակայանի վթարի վերացման աշխատանքների մասնակիցները, թրաֆիքինգի ենթարկված անձինք, ձերբակալվածներ, կալանավորված անձինք և ազատազրկման դատապարտվածները:

Ըստ նախարարի՝ այս խմբերի համար նաև արվելու են այնպիսի վիրահատություններ, ինչպիսիք են սրտի, աչքի, գլխուղեղի վիրահատական միջամտությունները. այս նպատակով բյուջեից հատկացվելու է 1.4 մլրդ դրամ։

Արսեն Թորոսյանը նաև տեղեկացրեց, որ երկու բժշկական կենտրոններում վաղվանից սկսելու են ուղեղի կաթվածի բուժման պետական ծրագիր:

Մանրամասները՝ տեսանյութում

Աղավնի Սուքիասյան