Դավիթ Բաբայանն արձագանքում է 2008 թ-ի Մարտի 1-ի դեպքերի ընթացքում հակառակորդի կողմից դիրքեր գրավելու մասին Շուշանյանի հայտարարությանը

Մարտի 1-ի արյունալի դեպքերի ժամանակ առաջնագիծը դատարկելու հետևանքով հակառակորդի կողմից մարտական դիրքեր են գրավվել, հայկական կողմը մեծ ջանքերի գնով է դրանք հետ բերել: Այսօր Factor.am-ի եթերում հայտարարել է «Մարտի 1-ի» գործով մի շարք նախկին դատապարտյալների պաշտպան, փաստաբան Մուշեղ Շուշանյանը:

«Ինձ հայտնի է, որ մարտական դիրքեր են գրավվել հակառակորդի կողմից և մեծ ջանքեր են պահանջվել դրանք հետ բերելու համար։ Եթե չեմ սխալվում, էնտեղ զոհերի մասին կարող է խոսք լինել»,- ասել է փաստաբանը:

Այս հայտարարության առնչությամբ Factor.am-ը փորձեց պարզաբանում ստանալ Արցախի նախագահի մամուլի քարտուղար Դավիթ Բաբայանից:
«Որքան ես եմ հիշում, այն ժամանակ հակառակորդը որևէ դիրք չի գրավել: Այդ տեղեկություններն ինձ ծանոթ չեն, առավելևս ՝ դիրքերի գրավման հետ կապված, այդպիսի բան չի եղել: Չեմ հիշում նման բան»,- ասաց Դավիթ Բաբայանը:
Մեր հարցին՝ անգամ հնարավոր զոհի մասին է նշվել, Արցախի նախագահի խոսնակը շեշտեց. «Եթե անգամ զոհ եղել է, ապա դա գուցե համընկել է, որովհետև Ադրբեջանն ամեն օր էլ կրակում է, բայց դա կապված չի եղել Մարտի 1-ի հետ: Կրկնում եմ՝ ես չեմ հիշում, որ 2008 թվականին Ադրբեջանն ինչ-որ դիրք է գրավել, առհասարակ իրենք ոչ մի դիրք չեն գրավել՝ ապրիլյան պատերազմից բացի»:

Փորձեցինք պարզաբանում ստանալ նաև ՀՀ պաշտպանության նախարարությունից, սակայն ՀՀ ՊՆ տեղեկատվության և հասարակայնության հետ կապերի վարչության պետ Գևորգ Ալթունյանն ասաց՝ մեզ հետաքրքրող հարցերի պատասխանները կտրվեն միայն գրավոր հարցում ուղարկելու դեպքում։ Factor.am-ը հրավոր հարցմամբ կփորձի ստանալ այս կարեւոր հարցի պատասխանը նաեւ ՀՀ ՊՆ-ից։

Շողիկ Գալստյան