Մենք չենք կարող նույնիսկ քննարկել «տարածքներ՝ խաղաղության դիմաց» բանաձևը․ Նիկոլ Փաշինյան. ՏԵՍԱՆՅՈՒԹ

ՀՀ նախագահի նստավայրում այսօր Կառավարության անդամների երդման արարողությունից հետո պատասխանելով ղարաբաղյան բանակցային գործընթացի և տարածքային զիջումների մասին խոսակցությունների հետ կապված լրագրողների հարցերին՝ վարչապետ Նիկոլ Փաշինյանը վստահեցրեց. «Բացառված է, որ լինի տեղեկություն և հանրությունը դրա մասին տեղյակ չլինի»:

Ինչ վերաբերում է ԱՄՆ նախագահի՝ ազգային անվտանգության հարցերով խորհրդական Ջոն Բոլթոնի հետ հեռախոսազրույցին, վարչապետն ասաց՝ Արցախի հարցը չեն քննարկել:

«Ես ասել եմ, որ Բոլթոնի հետ մեր հեռախոսային խոսակցության ընթացքում Ղարաբաղի հարցը չի քննարկվել, Ղարաբաղ կամ Արցախ անունները չեն շոշափվել»,- նշեց Նիկոլ Փաշինյանը։

Անդրադառնալով իր և Ադրբեջանի նախագահ Ալիևի հետ հանդիպմանն ու այդ հանդիպման օրակարգի բացակայության հարցին, Նիկոլ Փաշինյանն ասաց․ «Կարծում եմ, որ իմ գրառումը կարդաք, խոսակցության սկզբից մինչև վերջ, պատկերացում կարող եք կազմել, եթե դրան գումարեք նաև պարոն Բոլթոնի թվիթերյան գրառումը։ Կոռեկտ չէ, որ ես ասեմ, նա էսպես ասաց, ես էսպես ասացի»։

Հարցին՝ արդյոք համանախագահների կողմից եղել է նախաձեռնություն սկսել բանակցություններն ու թափ հաղորդել այդ գործընթացին, Նիկոլ Փաշինյանը պատասխանեց, որ այդ հարցը գտնվում է արտգործնախարարների քննարկման օրակարգում։

«Մենք պարոն Աիևի հետ ասել ենք, որ մեր արտգործնախարարներն են այդ թեմայով աշխատում»,- նշեց Փաշինյանը։

Հարցին՝ ընդդիմադիր ուժերը՝ մասնավորապես ՀՀԿ-ն, խոսում են այն մասին, որ շրջանառվում է «տարածքներ՝ խաղաղության դիմաց» թեզը, Նիկոլ Փաշինյանը պատասխանեց․ «Մենք չենք կարող նույնիսկ քննարկել «տարածքներ՝ խաղաղության դիմաց» բանաձևը։ Մեր կառավարությունը Ղարաբաղի հարցում վարում է մի քաղաքականություն, որ նախկինում որևէ կառավարություն չի վարել, հետևաբար՝ որևէ զուգահեռ և ընդհանրություն՝ գտնելու փորձերը նախկինում վարված որևէ քաղաքական ուղեգծի հետ, միանգամից ասեմ, կատարյալ մոլորություն են»,- ասաց վարչապետը։

Մանրամասները՝ տեսանյութում։

Աղավնի Սուքիասյան