16.01.2025 | 13:36
Ո՞նց ա լինում՝ տղան ամբողջ կյանքը առողջ է եղել, 17 տարեկանում հիվանդությունների փունջ է առաջանում. ՏԵՍԱՆՅՈՒԹ
Բանակցություններին Արցախի ներգրավվածությունն այս փուլում անհնար է. քաղաքագետ
Քաղաքականություն
30.01.2019 | 16:10
Հայաստանի վարչապետ Նիկոլ Փաշինյանն ու Ադրբեջանի նախագահ Իլհամ Ալիևն առաջիկայում կարող են հանդիպել: Հունվարի 30-ին լրագրողների հետ հանդիպմանը նման կարծիք հայտնեց քաղաքագետ Ալեքսանդր Իսկանդարյանը:
«Ես տեսնում եմ երկու երկրների ղեկավարների հանդիպման նախապատրաստություն: Չեմ կարող ասել՝ որքանով հաջող կամ անհաջող կլինի հանդիպումը, բայց նախապատրաստումը կա: Ակնհայտ է, որ մոտ ապագայում կլինի նաև ԱԳ նախարարների հանդիպում»,- նշեց քաղաքագետը:
Ըստ Ալեքսանդր Իսկանդարյանի՝ փաստացի ԵԱՀԿ Մինսկի խմբի վերակենդանացման գործընթաց է սկսվել, փորձ է արվում աշխուժացնել բանակցային գործընթացը. «Դա կապված է Հայաստանում իշխանության փոփոխության հետ: Մի կողմից՝ նոր քաղաքական վերնախավը փորձում է ինչ-որ կերպ փոխգործակցել համանախագահների և Ադրբեջանի հետ, մյուս կողմից՝ Ադրբեջանը փորձում է բարելավել իր իմիջը: Մենք տեսնում ենք, որ ադրբեջանական կողմից փոքր-ինչ այլ տիպի հայտարարություններ են հնչում: Դրանցից մի քանիսն արդեն համատեղ հայտարարություններ են՝ խաղաղությանը նախապատրաստվելու և այլնի մասին»:
Քաղաքագետն արձանագրում է. բռնության մակարդակի նվազում կա թե՛ հայ-ադրբեջանական, թե՛ ղարաբաղա-ադրբեջանական սահմանին, բայց չի պատկերացնում, որ հրադադարի ռեժիմի պահպանումը երկար կտևի:
«Չես կարող մի ձեռքով կրակել, մյուս ձեռքով՝ լուծել խնդիրը: Հարկավոր է նվազեցնել բռնության մակարդակը, կատարյալ պարագայում՝ զրոյի հասցնել, որպեսզի ինչ-որ փոխզիջումների հնարավորություն լինի: Սակայն ադրբեջանական կողմից փոխզիջումների պատրաստակամություն չենք տեսնում, նրանց դիրքորոշումը բավական հստակ արտահայտված է: Նրանք ասում են՝ պատրաստ ենք խոսել նախկին Լեռնային Ղարաբաղի մարզի մասին, մնացյալ տարածքները պետք է վերադարձվեն: Իսկ նախկին Լեռնային Ղարաբաղի մարզի առնչությամբ պատրաստ են խոսել ցանկացած կարգավիճակի մասին՝ Ադրբեջանի սահմաններում»,- ասաց քաղաքագետը:
Ալեքսանդր Իսկանդարյանի խոսքով՝ հասկանալի է, որ սա հանրության համար է ասվում և փակ ռեժիմով այլ տարբերակներ են քննարկվում. «Բայց դա նրանց պաշտոնական դիրքորոշումն է, որն ընդհանրապես չի փոխվել: Իսկ հայկական կողմի դիրքորոշումը բոլորովին այլ է»:
Բանակցություններին Արցախի ներգրավվածության մասին հարցին էլ քաղաքագետն արձագանքեց՝ դա լուրջ չէ: «Արցախին բանակցությունների սեղանի շուրջ տեսնելը հիմա անհնար է: Ադրբեջանն այս փուլում դրան չի համաձայնի»,- հավելեց քաղաքագետը:
