Շնչահեղձություն, զավեշտ է առաջացնում՝ երկու ամիս են աշխատել, բայց  իրենց պարգևատրել են․ Վարդան Բոստանջյան․ ՏԵՍԱՆՅՈՒԹ

Ազգային ժողովի նախկին պատգամավոր, տնտեսագետ Վարդան Բոստանջյանի համոզմամբ՝ այժմ գտնվում ենք այնպիսի իրավիճակում, երբ առաջին պլան են մղված կառավարման պետական համակարգի խնդիրները, որոնց կարգավորման ուղղությամբ նկատելի շարժում չկա, իսկ այս պահին բոլոր ոլորտներում կա իմիջիայլոց կառավարում՝ այդ թվում և գիտության ոլորտում։

Այս մասին այսօր հրավիրված մամուլի ասուլիսի ժամանակ ասաց տնտեսագետը՝ բարձրացնելով կառավարման համակարգի արդիականացման ու կադրային քաղաքականության հարցը։

«Այստեղ տեսնում ենք լիրիկականություն, սիրողականություն, նման մոտեցումներ, որոնց պարագայում ակնկալել, թե ունենալու ենք բարեփոխումներ՝ կասկածելի է։ Միգուցե որոշների մոտ ձևավորվի բողոքական մոտեցում, սակայն հասկանալի է, որ ժողովուրդը պատվիրակում է հանրության կառավարման խնդիրները համապատասխան պետական ինստիտուտներին, հետևաբար՝ հրապարակը չի կարող որոշել մեր զարգացման բոլոր ուղղությունները»,- ասաց տնտեսագետը՝ խորհուրդ տալով ընթերցել Հովհ․ Թումանյանի «Անկեղծ չենք» հոդվածը, որտեղ գրված է, թե ինչպես ժողովուրդ հասկացությունը շահարկելով կարելի է անել այն, ինչ արվում է։

Վարդան Բոստանջյանը հարցադրում հնչեցրեց՝ մենք երկի՞ր ենք, թե՞ երկիր չենք, մենք ուզո՞ւմ ենք առաջ գնալ, թե՞ ոչ և կարողանալո՞ւ ենք արդյոք մեր ռազմավարությամբ ներկայացնել մեր արտաքին քաղաքականությունը, անվտանգությունը, տնտեսական քաղաքականությունը։

«Դրանից հետո նոր կկարողանանք շարժվել կոռուպցիոն ռիսկերի կառավարման և ժողովրդավարական արժեքների հետևից։ Խոշոր հաշվով հասկանալի է, որ եթե ծրագիր չես ունենում, ամենահեշտ տարբերակը ժողովուրդ ասելն է։ Ո՞վ է ժողովուրդը, շատ կարևոր է, բայց նա արդեն իսկ լիազորել է ձեզ աշխատանք կատարելու, ոչ թե պարգևավճար ստանալու։ Շնչահեղձություն, զավեշտ է առաջացնում՝ երկու ամիս են աշխատել, բայց  իրենց պարգևատրել են»,- ասաց տնտեսագետը՝ խորհուրդ տալով նախ մտածել աղքատ զանգվածի մասին։

«Դեռևս մենք չենք սահմանել, թե ինչ է աշխատանքը, պարտավորությունը, պատասխանատվությունը, իսկ դրանց բացակայության պարագայում ինչքան ուզեն կարող են պարգևավճար և հավելավճար գրել, իսկ դա վերաբերում է ողջ կառավարման համակարգին»,- եզրափակեց նա:

Մանրամասները՝ տեսանյութում։

Աղավնի Սուքիասյան