Օսիպյանն ասում էր՝ սրանով ոչնչի չեք հասնի․ ՊՊԾ գնդի գրավման օրերին շտապօգնության տուժած աշխատակից

Երևանի ընդհանուր իրավասության դատարանի Շենգավիթի նստավայրում «Սասնա ծռեր» խմբի 10 անդամի գործով դատական նիստի ընթացքում այսօր դատարանում ցուցմունք տվեց 2016 թվականի հուլիսին ոստիկանության գրավված ՊՊԾ գնդում հերթապահած շտապօգնության աշխատակից Անահիտ Ենգիբարյանը:

Վերջինս նախորդ նիստերին չէր ներկայանում, և դատարանը նրան բերման ենթարկելու որոշում էր կայացրել։ Ենգիբարյանը դատարանին հայտնեց, որ հուլիսի 17-ին կանչ են ստացել և գնացել ՊՊԾ գունդ. «Ես բրիգադայի ֆելդշերն եմ, կանչը ստացել ենք, գնացել ենք։ Մտել ենք գունդ, անգիտակից վիճակում տեսել եմ պարոն Մխիթար Ավետիսյանին և ոստիկաններից մեկին եմ կաթիլային միացրել։ Մոտավորապես 15-20 մարդ եմ տեսել, պարոն Օսիպյանին, պարոն Փաշինյանին եմ տեսել էնտեղ, մեր ներկայիս վարչապետին»։

Տուժողը դատարանին նաև հայտնեց, որ տարածքում զինված անձանց չի տեսել։ Պատասխանելով պաշտպանական կողմի հարցին՝ ասաց, որ իրեն թե՛ ոստիկանները, թե՛ զինված խմբի անդամները շատ լավ են վերաբերվել։ Հարցաքննությունից հետո մեղադրողը միջնորդեց, որպեսզի հրապարակվեն Անահիտ Ենգիբարյանի նախաքննական ցուցմունքները, քանի որ դատաքննական և նախաքննական ցուցմունքներում առկա են էական հակասություններ։ Նախաքննական ցուցմունքում Ենգիբարյանը հայտնել էր, որ տեսել է զինված անձանց:

«Նրանք բոլորը զինված էին, տարածքը հսկում էին և այնտեղից փախչել հնարավոր չէր»,- նախկինում ասել էր տուժողը։ Նախկին ցուցմունքում կինը նաև պատմել էր, որ լսել է, թե ինչպես է ներկայիս ոստիկանապետ Վալերի Օսիպյանը բանակցում «Սասնա ծռերի» անդամների հետ․ «Ոստիկանների մոտ հիմնականում Արեգ Կյուրեղյանն էր, Օսիպյանը նրա հետ էր բանակցում, ասում էր, որ սրանով ոչնչի չեք հասնի»։

Կնոջ հարցաքննության և ցուցմունքների հրապարակումից հետո դատական նիստը հետաձգվեց, հաջորդ դատական նիստին կհարցաքննվեն նաև մյուս տուժողները։ Դատարանը հայտարարեց, որ կփորձեն ձեռնարկել միջոցներ, որպեսզի մյուս տուժողների ներկայացվածությունն էլ կարողանան ապահովել դատարանում։

Լիլիթ Շաբոյան