Դավիթ Անանյանի պաշտոնանկության մասին կառավարությունում չեն մտածում. Տիգրան Ավինյան. ՏԵՍԱՆՅՈՒԹ

ՊԵԿ նախագահ Դավիթ Անանյանի պաշտոնանկության մասին քննարկումներ կառավարությունում չեն եղել: Հունվարի 30-ին լրագրողների հետ զրույցում ասաց ՀՀ փոխվարչապետ Տիգրան Ավինյանը:

Պարգևավճարների՝ աղմուկ հանած թեմային անդրադառնալով՝ փոխվարչապետը նշեց, որ քաղծառայության համակարգն ընդհանուր վերանայման կարիք ունի:

«Բարոյական կողմի վրա, այո՛, միանշանակ պետք է ուշադրություն դարձնենք: Բայց եթե մենք ուզում ենք կայացնել իրապես մրցունակ պետական համակարգ, պետք է քաղծառայության համակարգը վերանայենք, ինչպես նաև պետական համակարգում աշխատավարձերը գոնե մոտեցնենք մասնավոր սեկտորին և սարքենք մրցունակ, որպեսզի լավագույն կադրերն ինչ-որ փուլում չգնան մասնավոր սեկտոր»,- նշեց նա:

Ինչ վերաբերում է գազի սակագնին, Ավինյանն ասաց՝ այս պահին որևէ նոր ասելիք չունի. «Բանակցություններն ընթացքի մեջ են, հենց նոր տեղեկատվություն լինի, մենք հասարակությանը կտեղեկացնենք այդ մասին»:

Իսկ ինչի՞ հաշվին է «Գազպրոմ»-ը սուբսիդավորում իրականացնելու, որպեսզի ներքին սպառողի համար գազի գինը, առնվազն հայտարարված մեկ տարվա ընթացքում, չբարձրանա: Այս հարցին փոխվարչապետը պատասխանեց. «Տարբեր կոմպոնենտներ կան, որոնց հաշվին ձևավորվում է գազի ներքին գինը սպառողի համար, դրանց վերահաշվարկի, վերագնահատման, կորուստների վերանայման հաշվին:  Տարբեր ցուցանիշներ կան, որոնք կարիք ունեն վերանայման, և ես կարծում եմ, որ մենք կգտնենք կոնկրետ այն կետերը, որտեղ այդ օպտիմալացումը հնարավոր է»:

Մանրամասները՝ տեսանյութում