Կնախատեսվի կասեցման սանկցիա մետաղական հանքարդյունաբերության ոլորտում․ ՏԵՍԱՆՅՈՒԹ

Հանքարդյունաբերության ոլորտի ընկերությունների իրական սեփականատերերին ի հայտ բերելու ուղղությամբ Հայաստանը սկսել է իրականացնել աշխատանքներ։ ՀՀ կառավարության աշխատակազմի ներկայացուցիչ, «Արդյունահանող ճյուղերի թափանցիկության նախաձեռնության» քարտուղարության ղեկավար Լիլիա Շուշանյանի խոսքով՝ մշակվել են օրենսդրական փաթեթներ, որոնք հաստատվել են կառավարության նիստում և անհետաձգելի կերպով ուղարկվել են խորհրդարան։ Քվորում չլինելու պատճառով այն դեռևս չի ընդունվել։

Լիլիա Շուշանյանը հույս է հայտնում, որ նորընտիր խորհրդարանը կհաստատի օրենսդրական նախաձեռնությունը։ «Դրանից հետո մենք կունենանք իրական սեփականատերերի բացահայտման, հրապարակման օրենսդրություն, որը կիրառելուց հետո Պետռեգիստրում կստեղծվի բաց ռեգիստր։ Մինչ այս, իրական սեփականատերեր կարող էին համարվել նաև իրավաբանական անձինք, բայց մշակված ու դեռ չընդունված օրենսդրական փաթեթով իրական սեփականատեր է համարվում ֆիզիկական անձը»,- ասաց Լիլիա Շուշանյանը։

Նրա խոսքով՝ իրական սեփականատերերի հայտարարագիր ներկայացնողը պետք է ինքը պատասխանատվություն կրի դրա ճշտության համար: «Պատահական չէ, որ տվյալ ռեգիստրը պետք է բաց լինի հասարակության համար և շեշտը դրվելու է հանրային վերահսկողության վրա։ Մենք այդտեղ ներմուծել ենք բավականին արդյունավետ նոր սանկցիա ոլորտի համար, որը նախկինում չի եղել, դա թույլտվությունների կասեցումն է։ Մինչև այդ եղել է կամ զգուշացում, կամ թույլտվությունների դադարեցում։ Ներմուծելով կասեցման սանկցիան՝ մենք կկարողանանք պրակտիկ կիրառել սանկցիաները, որոնք ավելի զգալի կլինեն հանքարդյունահանողների համար»,- նշեց Լիլիա Շուշանյանը։

Նպատակ կա այս գործիքների համակցմամբ ունենալ իրական սեփականատերերի բացահայտման արդյունավետ համակարգ։

Ռոբերտ Անանյան