02.07.2026 | 16:20
Կալլասը խոստանում է ԵՄ նոր պատժամիջոցներ ՌԴ-ի նկատմամբ՝ Կիևին ռուսական հարվածներից հետո
33-ամյա տղամարդուն մեղադրանք է առաջադրվել՝ համագյուղացուն դանակահարելու համար
Հասարակություն
29.01.2019 | 22:48
ՀՀ քննչական կոմիտեի Վայոց ձորի մարզային քննչական վարչությունում քննվող քրեական գործով ձեռնարկված միջոցառումների արդյունքում պարզվել են Վայոց Ձորի Զառիթափ գյուղի բնակչին ծանր մարմնական վնաս պատճառելու դեպքի մի շարք հանգամանքներ: Ձեռք բերված ապացույցների հիման վրա՝ մեղադրանք է առաջադրվել վերջինիս համագյուղացուն:
Նախնական տվյալներով՝ 2019 թվականի հունվարի 25-ին Երևան-Մեղրի ավտոճանապարհին գործող գիշերային ակումբում ծագած վիճաբանության ժամանակ Զառիթափ գյուղի բնակիչը՝ ծնված 1986թ., սուր կտրող-ծակող գործիքով հարվածել է համագյուղացուն՝ ծնված 1996թ.՝ պատճառելով «կրծքավանդակի աջ կեսի պլևրալ խոռոչի, որովայնի խոռոչի թափածակված կտրած-ծակած վերք, ստոծանու, լյարդի վնասումով, սուր ներքին արյունահոսություն» ախտորոշմամբ մարմնական վնասվածքներ:
Դեպքի առթիվ 2019թ. հունվարի 25-ին ՀՀ ոստիկանության Վայքի բաժնում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասով, որն ուղարկվել է ՀՀ քննչական կոմիտեի Վայոց ձորի մարզային քննչական վարչություն և նույն օրն ընդունվել վարույթ: Կազմվել է քննչական խումբ, Զառիթափ գյուղի 23-ամյա բնակիչը ճանաչվել է տուժող:
Քրեական գործով կատարված քննչական և դատավարական այլ գործողությունների արդյունքում պարզվել է, որ 2019թ. հունվարի 25-ին՝ ժամը 03:30-ի սահմաններում, Երևան-Մեղրի ավտոճանապարհին գործող գիշերային ակումբում Վայոց Ձորի մարզի Զառիթափ գյուղի 33-ամյա բնակիչը, գտնվելով ոգելից խմիչքի ազդեցության տակ, անտեսելով ակումբը փակվելու վերաբերյալ աշխատակիցների նախազգուշացումը, երաժշտություն պատվիրելու շուրջ վիճաբանության մեջ է մտել ակումբի բարմենի հետ, որի ընթացքում գարեջրի շիշ է նետել վերջինիս ուղղությամբ և հայհոյել: Այնուհետև 33-ամյա տղամարդու համագյուղացին փորձել է կանխել նրա խուլիգանական գործողությունները, սակայն վերջինս սկսել է վիճաբանել նաև 23-ամյա համագյուղացու հետ, որի ընթացքում իր մոտ եղած ծալովի դանակով երեք անգամ հարվածել է նրան՝ պատճառելով կյանքին վտանգ սպառնացող ծանր վնաս:
Ձեռք բերված բավարար ապացույցների համակցությամբ՝ 33-ամյա տղամարդուն մեղադրանք է առաջադրվել՝ ՀՀ քրեական օրենսգրքի 112-րդ հոդվածի 2-րդ մասի 9-րդ կետով: Քննիչը միջնորդություն է ներկայացրել դատարան՝ նրա նկատմամբ որպես խափանման միջոց կալանավորումը կիրառելու վերաբերյալ, ինչը բավարարվել է:
Քրեական գործով էական նշանակություն ունեցող մի շարք հանգամանքներ պարզելու համար նշանակվել են դատաքիմիական, դատաբժշկական և դատակենսաբանական փորձաքննություններ, հանձնարարություն է տրվել ոստիկանության համապատասխան ստորաբաժանմանը:
Նախաքննությունը շարունակվում է:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
