Մենք գիտենք՝ ինչպես պաշտպանվել կամ վնաս հասցնել. Զոհրաբ Մնացականյան․ ՏԵՍԱՆՅՈՒԹ

Ինչպես հայտնի է, Հայաստանի ու Ադրբեջանի արտգործնախարարները վերջին հանդիպումից հետո հայտարարել էին հասարակություններին խաղաղության պատրաստելու գործուն քայլեր կատարելու պատրաստակամության մասին: Եվ չնայած դրան, Իլհամ Ալիևը շարունակում է ռազմատենչ հռետորաբանությամբ հանդես գալ:

Արտգործնախարարությունում հրավիրված ասուլիսի ընթացքում Հայաստանի արտգործնախարար Զոհրաբ Մնացականյանին հարց ուղղվեց՝ այս պայմաններում ինչպե՞ս է Հայաստանը պատրաստվում իր հասարակությանը պատրաստել խաղաղության:

«Մեր դիրքորոշումները և դիրքը, վստահությունն այդ դիրքերի և դիրքորոշումների հանդեպ եղել ու մնում են շատ բարձր: Այսինքն՝ դուք առաջ եք բերում մի հարց, որտեղ խախտվում է այդ գաղափարախոսությունը; Ձեր բերած օրինակի դեպքում ցավում եմ ուղղակի: Մեր դիրքորոշումները հայտնի են՝ դուք գիտեք, թե մենք ինչպես ենք վերաբերվում ստատուսին, անվտանգությանը: Կրկնեմ՝ ստատուսի հարցը որոշում է Լեռնային Ղարաբաղի ժողովուրդը, անվտանգության հարցը նշանակում է, որ այսօր գոյություն ունեցող համակարգը ապահովում է համապարփակությունը անվտանգության, սա է այսօրվա իրողությունը: Ես կարիք չունեմ ասելու, թե որքան վճռական ենք մենք և որքան կարողություններ ունենք պաշտպանելու թե՛ ԼՂՀ-ն, թե՛ Հայաստանը: Մենք կարիք չունենք ամեն անգամ դուրս գալու և կրկնելու այդ իրողությունները: Մենք գիտենք ինչպես պաշտպանվել կամ վնաս հասցնել, բայց դրա հետևանքները ցանկալի չեն, ավելի վատն են, քան խաղաղ ճանապարհով գործընթացի հանգուցալուծումը: Մենք գիտենք մեր կարողությունները, բայց ցանկանում ենք խաղաղ ճանապարհով հանգուցալուծել այս գործընթացը: Հռետորաբանության օգտագործումից մեր վճռականությունը չի աճում»,- ասաց նախարարը:

Մանրամասները՝ տեսանյութում։

Ռոբերտ Անանյան