Քաղաքականություն
29.01.2019 | 15:49
«Դեկտեմբերի 9-ի ԱԺ ընտրությունները արտացոլեց ժողովրդի կամքը, դա ընտրություն էր, որն ակնհայտորեն ընդունվել է բոլորի կողմից և դա լավ բան է: Սա Հայաստանի համար յուրահատուկ ընտրություն էր և միջազգային հանրության կողմից էլ համարվեց թափանցիկ ընտրություն»,- Արտգործնախարարությունում հրավիրված ասուլիսի ընթացքում ասաց Եվրոպական միության հարևանության քաղաքականության և ընդլայնման հարցերի հանձնակատար Յոհաննես Հանը:
Ըստ նրա՝ ժամանակն է նայել ապագային, որպեսզի Հայաստանում ավելի ժողովրդավար իրավիճակ լինի: Յոհաննես Հանը ներկայացրեց մի քանի գործոն. «Մենք կարող ենք օժանդակել գյուղատնտեսության ապագային միտված ոլորտներին: Դատական և կրթական ոլորտները ևս մեզ համար առաջնային են: Կարևոր է նաև ֆինանսական բաղադրիչը: Այսօր 300 մլն եվրոյի ծրագրեր ընթացքի մեջ են, ևս 100 մլն եվրոյի ծրագրեր գալիս են: Ավելի քան 800 մլն եվրոյի ներդրում է արված էներգետիկայի ու տրանսպորտի ոլորտում: Ընդգծեմ, որ վերջերս ստորագրել ենք 23 միլիոն եվրոյի կրթական փաթեթ, մասնավորապես՝ ԹՈՒՄՈ կենտրոնի մասնակցությամբ: Այսօր կարող եմ հավաստիացնել, որ ԵՄ-ի հաջորդ 7-ամյա բյուջեով Հայաստանին, ինչպես մյուս հարևաններին, ավելի մեծ աջակցություն կնախատեսվի»:
Պարոն Հանը նշեց, որ Հայաստանին կտրվի լրացուցիչ ֆինանսական օգնություն՝ որպես խրախուսում անցյալ տարվա զարգացման համար: «Հայաստանում մթնոլորտը շատ լավն է, և դա լրացուցիչ աշխատատեղեր կստեղծի այստեղ, մարդկանց կօգնի որ մնան երկրում, չարտագաղթեն: Ես տեղեկացել եմ, որ անցյալ տարի Հայաստան ավելի շատ մարդ է եկել, քան մեկնել է, ինչը դրական ազդակ է արդեն իսկ»,- ասաց Յոհաննես Հանը:
Ռոբերտ Անանյան
