Մենք որևէ կասկած չունենք, որ դատարանները գործում են անկախ. Արմեն Գևորգյանի փաստաբան. ՏԵՍԱՆՅՈՒԹ

Թե՛ առաջին ատյանի դատարանը, թե՛ այսօր վերաքննիչ քրեական դատարանն արդար դատական ակտ են կայացրել, և մենք որևէ կասկած չունենք դատական համակարգի անկախության վերաբերյալ: Հունվարի 29-ին ՀՀ նախկին փոխվարչապետ Արմեն Գևորգյանի խափանման միջոցի հարցով վերաքննիչ դատարանի կողմից որոշման հրապարակումից հետո լրագրողների հետ զրույցում ասաց Գևորգյանի պաշտպաններից Էրիկ Ալեքսանյանը:

«Դատախազության ամբողջ շեշտը կայանում էր նրանում, որ կալանավորման պայման հիմնավոր կասկածները՝ թե՛ սահմանադրական կարգը տապալելու, թե՛ առանձնապես խոշոր չափերով կաշառք ստանալու մեղադրանքները միանշանակ կան, ինչի հետ պաշտպանական կողմը համաձայն չէ, և ինչի հետ նաև համաձայն չեղան առաջին ատյանի և վերաքննիչ դատարանները: Եվ նշվել էր, որ առկա են կալանավորման հիմքերը, որոնք նույնպես առկա չեն»,- նշեց փաստաբանը:

Նրա խոսքով՝ նախկինում վարույթն իրականացնող մարմինը կալանավորման հիմքերից նշել էր թաքնվելը, քննությանը խոչընդոտելը, սակայն «որևէ ապացույց, որը նման ենթադրություն կառաջացներ, վարույթն իրականացնող մարմինը չէր ներկայացրել»:

«Այստեղ մի նրբություն կա. վարույթն իրականացնող մարմինն անվիճելիորեն չի կրում ապացուցման բեռ՝ այս կամ այն հիմքն ապացուցելու, սակայն, բոլոր դեպքերում, պետք է ներկայացնի փաստական տվյալներ, որոնք այդ հիմքը հետագայում, իր համար ենթադրվում է, տեղի կունենան: Սակայն, ինչպես բոլորիս արդեն հայտնի դարձավ, այդ հիմքերը դատարանները նույնպես չտեսան»,- պարզաբանեց Ալեքսանյանը:

Էրիկ Ալեքսանյանը դժվարացավ նշել՝ արդյո՞ք վճռաբեկ բողոք կներկայացնեն, քանի որ Արմեն Գևորգյանն ու պաշտպանական թիմը չեն խորհրդակցել:

«Եթե մենք վերաքննիչ բողոք էինք ներկայացրել 190 հոդվածի հետ համաձայն չլինելու, այսինքն՝ հիմնավոր կասկածի արձանագրման հիմնավորմամբ, այս դեպքում պարզ տրամաբանությունը հուշում է, որ մենք պետք է նաև վճռաբեկ բողոք ներկայացնենք: Բայց հաշվի առնելով այն հանգամանքը, որ մենք դեռ չենք խորհրդակցել պարոն Գևորգյանի և մյուս պաշտպանի հետ, ուստի միանշանակ չեմ կարող պատասխանել՝ վճռաբեկ բողոք կներկայացնենք, թե՞ ոչ»,- ասաց պաշտպանը:

Մանրամասները՝ տեսանյութում