Քաղաքականություն
28.01.2019 | 20:14Հայոց բանակի 27-ամյակի օրվան նվիրված Պաշտպանության նախարարությունը միջոցառում էր կազմակերպել, որին հրավիրել էր ինչպես ներկա, այնպես էլ նախկին իշխանության օրոք աշխատած բարձրաստիճան զինվորականների։
Ուշագրավ էր, որ նախկին իշխանությունների ներկայացուցիչները, այդ թվում և՝ բանակը Մարտի 1-ի շրջանակներում ներգրավելու հարցում մեղադրվողները, ընդունել էին նոր իշխանությունների հրավերը։ Մասնավորապես՝ միջոցառմանը մասնակցում էր Հայաստանի պաշտպանության նախկին նախարար Սեյրան Օհանյանը։
Վերջինիս հարցրինք, թե նեղացած չէ արդյոք նոր իշխանություններից, չէ՞ որ իրավիճակի փոփոխությունից հետո նա հայտնվեց մեղադրյալի աթոռին։ Պարզվեց, որ Սեյրան Օհանյանը ոչ միայն նեղացած չէ, այլ, ինչպես ինքն ասաց՝ դեռ մի բան էլ 2016 թվականից է ուզել, որ երկրում կտրուկ շրջադարձ լինի։
Պաշտպանության նախարարության կազմակերպած միջոցառմանը մասնակցում էր Մարտի 1-ի գործով մեղադրյալի աթոռին հայտնված մեկ այլ նախկին բարձրաստիճան զինվորական՝ ՀԱՊԿ նախկին գլխավոր քարտուղար Յուրի Խաչատուրովը, որին լրագրողների հարցերից խուսափելու հարցում օգնեց պաշտպանության նախարար Դավիթ Տոնոյանը՝ վերջինիս թևանցուկ անելով ու ուղեկցելով հանդիսությունների սրահ։
Իսկ ահա ՀՀ ՊՆ նախկին նախարար, Հանրապետական կուսակցության փոխնախագահ Վիգեն Սարգսյանը չցանկացավ պատասխանել լրագրողների հարցերին՝ բավարարվելով միայն տոնի կապակցությամբ շնորհավորանքով:
Ուշագրավ էր, որ Հայաստանի և Արցախի Հանրապետությունների նախագահները ժամանեցին միասին՝ մեկ մեքենայով։ Նրանց կրկին ողջունեց և ընդունեց ՀՀ պաշտպանության նախարար Դավիթ Տոնոյանը: Հայկական երկու պետությունների նախագահներին սպասարկող մեքենան լրագրողներից հեռու կայանվեց և հետևաբար, հարցեր հղել նրանց չհաջողվեց։
Միջոցառմանը մասնակցում էին նաև ԱԺ նախագահն ու ներկա և նախկին պատգամավորներ։ Նախկիններից նկատեցինք Սամվել Ալեքսանյանին։
Նիկոլ Փաշինյանը եկավ վերջում, նրա մեքենան լրագրողներից հեռու կայանվեց և վարչապետին հարցեր ուղղելու հնարավորություն ևս չեղավ։
Մանրամասները՝ տեսանյութում։
Լիլիթ Շաբոյան
